Հասարակություն
18.11.2025 | 13:10Ազգային ժողովում ընթանում է ««Մարտի 1-ի գործի» քննությունը նախորդող ժամանակահատվածում, «Մարտի 1-ի գործի» վերաիմաստավորումը «Ֆարմանյանը և այլք ընդդեմ Հայաստանի» գործով կայացված վճռի լույսի ներքո» թեմայով հանրային քննարկումը:
Հակակոռուպցիոն կոմիտեի նախագահ Արթուր Նահապետյանին հարց ուղղեց պատգամավոր Անուշ Քլոյանը, «Մարտի 1»-ի զոհերից Գոռ Քլոյանի քույրը։
«Դուք ձեր խոսքում նշեցիք, որ ներքին գործերի զինվորականների մոտ եղել են «Չերյոմուխա-7» զինատեսակը, որն արգելված զինատեսակ է, մահաբեր զինատեսակ է, և եղել են նաև հրաման տվողներ, որոնք այդ զինատեսակից կրակել են մեր քաղաքացիների վրա, որոնք և զոհվել են այդ «Չերյոմուխա-7» զինատեսակից, և այդ մեր զոհված քաղաքացիների մարմնից դուրս է բերվել այդ զինատեսակը։ Ձեր խոսքում նշեցիք, որ չկան համապատասխան սարքավորումներ, որպեսզի կարողանան նույնականացնել, թե կրակողներից ով ում է կրակել։ Լավ, շատ բարի, ներկայացմամբ չենք կարողանում բացահայտել, և այդ սարքավորումները չկան։ Ես ուզում եմ իմանալ, ներկա դրությամբ մենք ի՞նչ քայլեր ենք իրականացնում, որպեսզի ձեռք բերենք այդ սարքավորումները և կարողանանք պարզաբանել, թե ով ում է կրակել, ո՞ր զինվորականն է կրակել որ քաղաքացուն»,-հետաքրքրվեց պատգամավորը։
Նահապետյանը ևս մեկ անգամ նշեց, որ նախաքննական մարմինը նույնականացման խնդիր ունի։
«Մեր տեղի փորձագիտական հիմնարկներում այդպիսի հնարավորություն, ըստ էության, չունենք, այդպիսի հետազոտող սարքավորումներ չունենք, որպեսզի հստակ նույնականացում ստանանք։ Բայց այդ ուղղությամբ մենք աշխատանքներ կատարում ենք, և պարբերաբար տեղեկատվության պահանջներ ենք ուղարկում փորձագիտական տեղի հիմնարկներին, ինչպես նաև միջազգային փորձագիտական կազմակերպություններին, որպեսզի հնարավորություն ստեղծենք այդ փամփուշտները նույնականացնելու համար, և արդյունքում կարողանանք հասկանալ նախաքննությամբ, թե որ փամփուշտը որ զենքից է կրակվել, և այդ զենքը կոնկրետ որ զինծառայողին կամ ոստիկանության աշխատակցին է պատկանել»,-նշեց կոմիտեի նախագահը։
Մանրամասները՝ տեսանյութում։
