ԵՀ նախագահը նշել է Ուկրաինային ֆինանսական օգնության երեք սցենար

ԵՄ անդամ պետություններին ուղղված նամակում Եվրահանձնաժողովի նախագահ Ուրսուլա ֆոն դեր Լեյենը ներկայացրել է Ուկրաինայի ֆինանսական աջակցության երեք տարբերակ՝ առանձին երկրներից դրամաշնորհներ, նոր համատեղ պարտք կամ սառեցված ռուսական ակտիվների օգտագործում: Փաստաթղթին ծանոթացել են Reuters-ը և Financial Times-ը, փոխանցում է DW-ի ռուսական ծառայությունը։

Հոկտեմբերի վերջին ԵՄ գագաթնաժողովում անդամ պետությունները համաձայնել էին բավարարել Ուկրաինայի «անհետաձգելի ֆինանսական կարիքները» 2026 և 2027 թվականներին: Իր նամակում ֆոն դեր Լեյենը նշել է, որ դրա համար անհրաժեշտ է 135,7 միլիարդ եվրո։

«Մենք նշել ենք երեք հիմնական տարբերակ՝ անդամ պետությունների աջակցությունը դրամաշնորհների միջոցով, վարկ, որը ֆինանսավորվում է ԵՄ-ի կողմից ֆինանսական շուկաներում փոխառությունների միջոցով կամ վարկ, որը կապված է սառեցված ակտիվների միջոցների հետ»,- նշվում է փաստաթղթում:

Այս տարբերակները կարող են համակցվել կամ կիրառվել հաջորդաբար: Եվրոպական հանձնաժողովի ղեկավարը նամակում առանձին նշել է, որ Ուկրաինայի ֆինանսավորման վերաբերյալ որոշումը պետք է կայացվի արագ և պատրաստ լինի համաձայնեցման դեկտեմբերին կայանալիք Եվրոպական խորհրդի հաջորդ նիստում։

«Հաշվի առնելով իրավիճակի հրատապությունը, տարբերակների բարդությունը և 2026 թվականի երկրորդ եռամսյակում վճարումները սկսելու անհրաժեշտությունը, առաջարկվող տարբերակներից որևէ մեկը կարող է ծառայել որպես անցումային և ժամանակավոր միջոց»,- նշել է ֆոն դեր Լեյենը։

Որպես օրինակ՝ նա նշել է, որ ԵՄ երկրների կողմից չվերադարձվող աջակցությունը կամ փոխառության միջոցով վարկը «կարող են լինել ժամանակավոր լուծումներ»՝ մինչև միության նոր երկարաժամկետ բյուջեի ընդունումը, որն ուժի մեջ կմտնի 2028 թվականին և կարող է ծառայել որպես ԵՄ-ի կողմից ֆինանսավորվող վարկերի երաշխիք։

Հոկտեմբերին ԵՄ գագաթնաժողովում Բելգիայի վարչապետ Բարտ դե Վևերը հայտարարել էր, որ չի սատարի Ուկրաինային աջակցելու համար սառեցված ռուսական ակտիվներն օգտագործելու՝ եվրոպական նախաձեռնությունը, եթե ԵՄ մյուս երկրները չկիսեն հնարավոր ռիսկերը։

Նա նշել էր, որ Բելգիայից բացի՝ մի քանի երկրներ «պահում են ռուսական հսկայական գումարներ», բայց այդ երկրների ներկայացուցիչները «լռում են դրա մասին»։

«Եթե մենք գործենք, ապա կգործենք միասին։ Սա եվրոպական համերաշխություն է»,- ասել էր քաղաքական գործիչը։

ԵՄ երկրները համաձայն են, որ Բելգիան պետք է պաշտպանված լինի, բայց դեռևս բոլորը չեն համաձայնվել կոնկրետ երաշխիքների շուրջ։ Սակայն, Politico-ի փոխանցմամբ, իր նամակում ֆոն դեր Լեյենը վստահեցրել է Բելգիային, որ միայնակ չի մնա ռուսական ակտիվների առգրավման իրավական կամ ֆինանսական հետևանքների առջև։ Սառեցված ակտիվներն Ուկրաինային փոխանցելու վերաբերյալ վերջնական որոշումը, ենթադրվում է, կկայացվի դեկտեմբերի 18-19-ին կայանալիք ԵՄ գագաթնաժողովում։

Թարգմանությունը՝ Էմմա Չոբանյանի