09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Ինքնահռչակ Դոնեցկի իշխանությունները հայտարարել են, թե ուկրաինական հարձակման պատճառով մոտ 500 հազար բաժանորդ առանց էլեկտրաէներգիայի է մնացել․ ՏԵՍԱՆՅՈՒԹ
Քաղաքականություն
17.11.2025 | 12:50
Ռուսաստանի կողմից նշանակված ինքնահռչակ Դոնեցկի հանրապետության ղեկավար Դենիս Պուշիլինը հայտարարել է, որ ուկրաինական հարձակման հետևանքով Դոնեցկում, Մակեևկայում, Գորլովկայում և Յասինովատայում շուրջ 500,000 բաժանորդ առանց էլեկտրականության է մնացել։ Նա այս մասին գրել է իր տելեգրամի ալիքում, փոխանցում է Current time-ը։
«Էներգետիկներն անմիջապես սկսել են վերականգնել էլեկտրաէներգիան։ Այս պահին էլեկտրաէներգիան վերականգնվել է Գորլովկայում, Դոնեցկի որոշ հատվածներում և Մակեևկայում։ Արտակարգ աշխատանքները շարունակվում են»,- գրել է նա։
Ըստ տեղեկությունների՝ հարձակման է ենթարկվել Չայկինո 330 կՎ ենթակայանը։
Astra-ն էլ, հղում անելով տեղական ալիքներին, հայտնել է «Դոնեցկի մարզի օկուպացված մասում, այդ թվում՝ Դոնեցկում, Մակեևկայում, Գորլովկայում և Ենակիևոյում էլեկտրաէներգիայի լրիվ անջատման մասին»։ Ռուսաստանի իշխանությունների կողմից Գորլովկայի ղեկավար նշանակված Իվան Պրիխոդկոն հաստատել է քաղաքում էլեկտրաէներգիայի անջատման և վերանորոգման աշխատանքների մասին լուրերը։
«Նովայա գազետա Եվրոպա»-ն հաղորդել է, որ Ռուսաստանում անօդաչու թռչող սարքերի հարձակումների պատճառով էլեկտրաէներգիայի անջատումների և ցանցին հասցված վնասների մասնաբաժինը 2025 թվականին 9%-ից աճել է մինչև 11%-ի։
Ուլյանովսկի մարզի նահանգապետ Ալեքսեյ Ռուսկիխն էլ հայտարարել է Վեշկայմսկի շրջանում գտնվող ենթակայանի վրա հարձակման մասին։ Նա նշել է, որ ոչ ոք չի տուժել, բնակելի թաղամասերի էլեկտրամատակարարումը բնականոն կերպով գործում է։ Astra-ն պարզաբանել է, որ այս ենթակայանն ապահովում Ուլյանովսկի մարզի, Մորդովիայի, Չուվաշիայի և Սամարայի մարզերի էներգահամակարգերի միջև միացումը։
Թարգմանությունը՝ Էմմա Չոբանյանի
