Թրամփը կրկին պատժամիջոցներով է սպառնացել ՌԴ առևտրային գործընկերներին․ Իրանը նույնպես կարող է ներառվել այդ ցանկում

ԱՄՆ Հանրապետական ​​կուսակցության անդամները մշակում են օրենք, որով պատժամիջոցներ են նախատեսվում ցանկացած երկրի նկատմամբ, որը կշարունակի գործարքներ կնքել Ռուսաստանի հետ Ուկրաինա լայնածավալ ներխուժման ընթացքում։ Այս մասին հայտարարել է ԱՄՆ նախագահ Դոնալդ Թրամփը, գրում է DW-ի ռուսական ծառայությունը։

Լրագրողի հարցին՝ արդյո՞ք ժամանակն է, որ ԱՄՆ Կոնգրեսը շարունակի ճնշում գործադրել Ռուսաստանի և այդ երկրի նախագահ Վլադիմիր Պուտինի վրա՝ Ուկրաինայում պատերազմը դադարեցնելու համար, Թրամփը պատասխանել է․ «Ես լսել եմ, որ նրանք աշխատում են դրա վրա, և ես համաձայն եմ դրա հետ։ Հանրապետականներն առաջ են մղում շատ ուժեղ օրինագիծ, որը պատժամիջոցներ կսահմանի Ռուսաստանի հետ գործարք կնքող ցանկացած երկրի նկատմամբ»։

Նրա խոսքով՝ Իրանը կարող է ավելացվել այդ երկրների ցանկին։

Այս տարվա ապրիլին սենատորներ Լինդսի Գրեհեմը և Ռիչարդ Բլյումենտալը կոչ էին արել մինչև 500 տոկոս առևտրային մաքսատուրքեր սահմանել այն երկրների նկատմամբ, որոնք Ռուսաստանից նավթ, գազ, ուրան և այլ ապրանքներ են գնում ու  չեն աջակցում Ուկրաինային ռուսական ներխուժումից պաշտպանվելու հարցում։

«Հնդկաստանը և Չինաստանը գնում են Պուտինի նավթի 70%-ը՝ շարունակելով նրա ռազմական մեքենան աշխատեցնել։ Իմ օրինագիծը համահեղինակել են 84 սենատորներ։ Այն թույլ կտա նախագահին պատժամիջոցներ կիրառել Հնդկաստանի, Չինաստանի և այլ երկրների նկատմամբ՝ Պուտինի ռազմական մեքենայի ֆինանսավորումը դադարեցնելու և նրանց բանակցային սեղանի շուրջ նստեցնելու համար»,- բացատրել էր Գրեհեմն իր նախաձեռնության մասին։

Նա հունիսի վերջին  հայտարարել էր, որ ԱՄՆ նախագահն աջակցում է իր նախաձեռնությանը, սակայն ավելի ուշ Թրամփը 500 տոկոսանոց մաքսատուրքեր սահմանելու գաղափարն անվանել էր «մի փոքր անիմաստ», քանի որ այդ մեթոդը «կորցնում է իր իմաստը» որոշակի կետից այն կողմ։

«100 տոկոսանոց մաքսատուրքերը կծառայեին նույն նպատակին»,- ասել է ԱՄՆ նախագահը հուլիսին Սպիտակ տանը ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ։

Հուլիսի վերջին ԱՄՆ-ը 25 տոկոսով բարձրացրել էր մաքսատուրքերը Հնդկաստանից ապրանքների համար՝ հղում անելով երկրի կողմից Ռուսաստանից նավթի շարունակական գնումներին։

Թարգմանությունը՝ Էմմա Չոբանյանի