Ռոբերտո Մարտինեսը և Բրունու Ֆերնանդեշը գովեստի խոսքեր են ասել Հայաստանի հավաքականի մասին

Պորտուգալիայի հավաքականի գլխավոր մարզիչ Ռոբերտո Մարտինեսը և կիսապաշտպան Բրունու Ֆերնանդեշը նախախաղային ասուլիսում կարծիք են հայտնել Հայաստանի ազգային հավաքականի մասին, որի դեմ մրցելու են ԱԱ-2026-ի եվրոպական գոտու ընտրական մրցաշարի F խմբի վերջին տուրում, հաղորդում է A Bola-ն։

Ռոբերտո Մարտինես․ «Նախորդ խաղից առաջ շատ եմ խոսել Հայաստանի հավաքականի մասին։ Մարդիկ չգիտեն, թե ինչ կարող է անել Հայաստանի հավաքականը։ Նոր գլխավոր մարզիչը շատ ժամանակ չի ունեցել թիմի հետ աշխատելու համար, բայց դա մի հավաքական է, որը փորձում է խաղալ կենտրոնական գոտիներով, խելացի է, ստեղծագործական կարողություն ունի։ Նրանք ունեն 5 պաշտպանով շատ պաշտպանողական խաղաոճ և ուժեղ միջին գիծ։ Նրանք շատ լավ խաղեր անցկացրին Իռլանդիայի դեմ։ Իռլանդիայի նկատմամբ հաղթանակը ցույց է տալիս Հայաստանի հավաքականի ուժը․ դա շատ մրցունակ թիմ է։ Մենք մեծապես հարգում ենք մրցակցին»,- ասել է իսպանացի մարզիչը։

Բրունու Ֆերնանդեշ․ «Մենք արդեն խաղացել ենք Հայաստանի հավաքականի դեմ։ Նրանք շատ արագ են, ունեն որակյալ կիսապաշտպանություն և ցուցադրում են շատ-շատ արգեսիվ ֆուտբոլ։ Գիտենք, որ կարող է բարդ հանդիպում ստացվել, բայց մենք պետք է կենտրոնանանք այն խնդիրների վրա, որոնք մենք ենք ստեղծելու մրցակցի համար։ Մենք Պորտուգալիան ենք և պետք է օգտագործենք մեր առավելությունն այնպես, որ մրցակցի ուժեղ կողմերն աննկատ մնան»,- նշել է անգլիական «Մանչեսթեր Յունայթեդի» ֆուտբոլիստը։

Պորտուգալիա – Հայաստան հանդիպումը կկայանա նոյեմբերի 16-ին Պորտուի «Դրագաու» ստադիոնում ու կմեկնարկի Երևանի ժամանակով 18։00-ին։ 5-րդ տուրից հետո ընտրական F խմբի առաջատարը Պորտուգալիայի հավաքականն է, որն ունի 10 միավոր։ Հունգարիան վաստակել է 8 միավոր, Իռլանդիան՝ 7, իսկ Եղիշե Մելիքյանի գլխավորած թիմը 3 միավորով խմբի հետնապահն է և կորցրել է հաջորդ փուլ դուրս գալու շանսերը։