Փաստաբան Ալեքսանդր Կոչուբաևի անձնական իրերը կվերադարձվեն. նրա գործի քննությունը սկսվեց Երևանի քրեական դատարանում

Գարիկ Աբելյանի նախագահությամբ այսօր սկսվեց փաստաբան Ալեքսանդր Կոչուբաև գործի քննությունը: Կոչուբաևին մեղադրանք է ներկայացվել ֆեյսբուքյան գրառման համար:

Ըստ մեղադրանքի՝ նա Երևան քաղաքի քննչական վարչության ծանր հանցագործությունների քննության բաժնում իրականացվող քրեական վարույթի շրջանակներում Հայ Առաքելական սուրբ եկեղեցու Արագածոտնի թեմի առաջնորդ Հայկ Պերճի Պռոշյանի /Մկրտիչ Սրբազան/ կալանավորման հանգամանքների կապակցությամբ՝ «Ֆեյսբուք» սոցիալական ցանցի միջոցով կատարել է նշված քրեական վարույթով նախաքննությունն իրականացնող քննչական խմբի քննիչներին, հսկող դատախազի և կալանավորումը որպես խափանման միջոց կիրառելու մասին որոշում կայացրած դատարանի մասին արատավորող և նշված անձանց իրավունքներին ու օրինական շահերին էական վնաս պատճառող տեղեկության հրապարակում:

Կոչուբաևը գրառումից հետո բիրտ ուժի կիրառմամբ դիմակավորված անձանց կողմից ձերբակալվել է Շենգավիթի դատարանի հարակից տարածքից ու տարվել Քննչական կոմիտե, որտեղ նրան մեղադրանք է ներկայացվել Քրեական օրենսգրքի 490-րդ հոդվածի 2-րդ մասով ու դատարան տարվել կալանքի միջնորդություն, որը մակագրվել է դատավոր Մասիս Մելքոնյանին։ Նա Կոչուբաևին կալանավորել է, և միայն գործի նախաքննության ավարտին, ընտանեկան հանգամանքներով պայմանավորված, Դատախազությունը նրա նկատմամբ ընտրված կալանքը փոխել է բացակայելու արգելքով:

Այսօրվա դատական նիստին Կոչուբաևը հայտնեց, որ մեղադրական եզրակացությունը չի ստացել: Փաստաբանը նշեց, որ փոստից իրեն հայտնել են, որ նամակ ունի, բայց անձնագիր չունի՝ այն ստանալու համար: Միաժամանակ Կոչուբաևը հայտնեց, որ իրենից նախաքննության ընթացքում առգրավված իրերից և ոչ մեկն իրեղեն ապացույց չի ճանաչել և միջնորդեց դրանq վերադարձնել:

Խոսքը մեքենայի, համակարգչի հեռախոսի մասին է: Հանրային մեղադրողը չառարկեց իրերը վերադարձնելու դեմ: Դատարանը որոշեց, որ դրանք կվերադարձվեն: Նկատի ունենալով, որ Կոչուբաևը չի ստացել մեղադրական եզրակացությունը՝ դատարանը հետաձգեց նիստը:

Արաքս Մամուլյան