Պենտագոնը հայտարարել է թմրավաճառների դեմ նոր գործողության մեկնարկի մասին

ԱՄՆ պաշտպանության նախարար Փիթ Հեգսեթը հայտարարել է Արևմտյան կիսագնդում թմրավաճառների դեմ նոր գործողության մեկնարկի մասին, որը կոչվում է «Հարավային նիզակ»՝Southern Spear, գրում է DW-ի ռուսական ծառայությունը։

«Այս առաքելությունը կպաշտպանի մեր հայրենիքը, կհեռացնի թմրաահաբեկիչներին մեր կիսագնդից և կապահովի մեր երկրի անվտանգությունը թմրանյութերից, որոնք սպանում են մեր ժողովրդին։ Արևմտյան կիսագունդն Ամերիկայի տարածքն է, և մենք կպաշտպանենք այն»,- գրել է Հեգսեթը X սոցիալական ցանցում։

ԱՄՆ պաշտպանության նախարարի խոսքով՝ գործողությունը կղեկավարեն այդ նպատակով ստեղծված հատուկ նշանակության խումբը և ԱՄՆ Հարավային հրամանատարությունը (Southcom): Southcom-ն արդեն իր տրամադրության տակ ունի USS Gerald R. Ford ավիակիրը: Այն կմիանա այլ ռազմանավերին, միջուկային սուզանավին և Պուերտո Ռիկոյում տեղակայված ինքնաթիռներին:

Սեպտեմբերի սկզբից ի վեր ամերիկյան նավերը պարբերաբար հարվածներ են հասցնում միջազգային ջրերում գտնվող այն նավերին, որոնք Վաշինգտոնը կասկածում է վենեսուելական թմրավաճառների հետ կապերի մեջ։ Միաժամանակ, ԱՄՆ-ն նավերի խումբ է տեղակայել Վենեսուելայի ափերի մոտ՝ վկայակոչելով թմրանյութերի ապօրինի շրջանառության դեմ պայքարը, և կործանիչներ է տեղակայել Պուերտո Ռիկոյում։

Ըստ The New York Times-ի՝ Վաշինգտոնը մշակել է հակամարտության սրման մի քանի սցենարներ, այդ թվում՝ Վենեսուելայի նախագահ Նիկոլաս Մադուրոյի իշխանությունից բռնի հեռացումը։

Թարգմանությունը՝ Էմմա Չոբանյանի