Ֆուտբոլի 2026թ. աշխարհի առաջնության եվրոպական գոտու ընտրական մրցաշարի F խմբի 5-րդ տուրում Պորտուգալիայի հավաքականը մրցակցի խաղադաշտում 0։2 հաշվով պարտվեց իռլանդացիներին, իսկ Կրիշտիանու Ռոնալդուն ստացավ կարմիր քարտ և բաց կթողնի ազգային թիմի առաջիկա հանդիպումը Հայաստանի հավաքականի դեմ։
Դուբլինում կայացած խաղում դաշտի տերերի 2 գոլերն առաջին խաղակեսում խփեց նիդերլանդական «Ազ Ալկմարի» հարձակվող Տրոյ Պարոթը։
Պորտուգալիայի հավաքականի ավագ, Սաուդյան Արաբիայի «Ալ Նասրի» հարձակվող Կրիշտիանու Ռոնալդուն 61-րդ րոպեին կարմիր քարտ ստացավ մրցակցին արմունկով հարվածելու համար (տեսանյութ)։ Դա 40-ամյա Ռոնալդուի կարիերայի առաջին կարմիր քարտն էր Պորտուգալիայի հավաքականում, որի կազմում անցկացնում էր 226-րդ հանդիպումը։ Ակումբային կարիերայում «Ոսկե գնդակի» 5-ակի դափնեկիրը խաղադաշտից հեռացվել է 12 անգամ։
Չնայած պարտությանը՝ պորտուգալացիները 10 միավորով շարունակում են գլխավորել F խմբի մրցաշարային աղյուսակը։ Հունգարացիները Հայաստանի հավաքականի նկատմամբ հաղթանակից հետո ունեն 8 միավոր, Իռլանդիան՝ 7, իսկ Եղիշե Մելիքյանի գլխավորած թիմը 3 միավորով խմբի հետնապահն է և կորցրել է հաջորդ փուլ դուրս գալու շանսերը։
Վերջին տուրում Հայաստանի հավաքականը նոյեմբերի 16-ին Պորտուի «Դրագաու» ստադիոնում կմրցի Պորտուգալիայի հետ, իսկ Հունգարիայի ու Իռլանդիայի թիմերը կհանդիպեն Բուդապեշտում։
ԱԱ-2026-ի ընտրական փուլ
F խումբ, 5-րդ տուր
Իռլանդիա – Պորտուգալիա՝ 2։0
Տրոյ Պարոթ, 17, 45
Հեռացում՝ Կրիշտիանու Ռոնալդու, 61 (Պորտուգալիա)
