05.12.2025 | 23:01
Եվրոպական հանձնաժողովը 120 միլիոն եվրոյով տուգանել է Իլոն Մասկի X-ին
Ուկրաինան դադարեցրել է Ռուսաստանի հետ խաղաղության բանակցությունները
Քաղաքականություն
13.11.2025 | 12:13
Ռուսաստանի և Ուկրաինայի միջև անցկացվող խաղաղության բանակցությունները դադարեցվել են առաջընթացի բացակայության պատճառով։ Այս մասին հայտարարել է Ուկրաինայի փոխարտգործնախարար Սերգեյ Կիսլիցյան The Times-ին տված հարցազրույցում, փոխանցում է DW-ի ռուսական ծառայությունը։
Նրա խոսքով՝ 2025 թվականի ամռանից ի վեր Կիևը փորձում է համոզել իր միջազգային գործընկերներին ուժեղացնել ճնշումը Ռուսաստանի նախագահ Վլադիմիր Պուտինի վրա՝ Ուկրաինայի նախագահ Վլադիմիր Զելենսկիի հետ անձնական հանդիպման հասնելու համար։
«Բռնապետության պայմաններում անհնար է արդյունավետ քննարկումներ անցկացնել բռնապետին ներկայացնող բանակցային թիմերի հետ։ Նրանք ունեն շատ կոշտ մանդատ և պետք է պաշտպանեն իրենց հանձնարարված դիրքորոշումը»,- ասել է Կիսլիցյան՝ խոսելով Ստամբուլում Ռուսաստանի և Ուկրաինայի պատվիրակությունների միջև հանդիպումները։
Ստամբուլի բանակցությունները տեղի են ունեցել երեք փուլով՝ մայիս, հունիս և հուլիս ամիսներին։ Ուկրաինան պնդել է անվերապահ հրադադարի և քաղաքացիական ենթակառուցվածքների վրա հարձակումների դադարեցման հարցում։ Ռուսաստանի պատվիրակությունը, որը գլխավորում էր ՌԴ նախագահի օգնական Վլադիմիր Մեդինսկին, մերժել է հրադադարը և պահանջել, որ Ռուսաստանը ճանաչի բռնակցված տարածքները և սահմանափակի Ուկրաինայի զինված ուժերի թվաքանակը։
Կիսլիցայի հարցազրույցի հրապարակումից հետո ՌԴ ԱԳ նախարարությունը հայտարարել է, որ Կրեմլը պատրաստ է վերսկսել բանակցությունները Թուրքիայում:
«Թուրքիայի ներկայացուցիչները բազմիցս կոչ են արել վերսկսել դրանք: Ռուսական թիմը պատրաստ է. գնդակն Ուկրաինայի դաշտում է»,- ՏԱՍՍ-ին հայտնել է ՌԴ ԱԳՆ ԱՊՀ երկրորդ դեպարտամենտի ղեկավար Ալեքսեյ Պոլիշչուկը։
Ըստ նրա՝ նախորդ հանդիպումների ընթացքում ձեռք են բերվել «կարևոր համաձայնություններ մարդասիրական ոլորտում»՝ գերիների լայնածավալ փոխանակման, զոհերի մարմինների հայրենադարձման և քաղաքացիական անձանց վերադարձի վերաբերյալ։
Պոլիշչուկը նշել է, որ Ուկրաինան չի արձագանքել Ռուսաստանի առաջարկին՝ ստեղծել «Ստամբուլի գործընթացի երեք աշխատանքային խմբեր»։
Ի պատասխան՝ Կիսլիցյան հայտարարել է, որ Մոսկվայի նախաձեռնությունը հավասարազոր է ձևական գործողությունների. ռուսներն առաջարկել են ստեղծել «WhatsApp խմբեր» և նմանատիպ ալիքներ՝ խուսափելով հարցերի էական քննարկումից։ Ուկրաինացի դիվանագետի խոսքով՝ Մոսկվան այդպիսով փորձում էր ԱՄՆ-ին ցույց տալ բանակցություններում թվացյալ առաջընթաց և խուսափել նոր պատժամիջոցներից։
ՌԴ ԱԳՆ պաշտոնական ներկայացուցիչ Մարիա Զախարովան նույնպես արձագանքել է Կիսլիցայի հայտարարություններին։
«Սա խոստովանություն է այն մասին, որ Զելենսկիի ռեժիմը չի պատրաստվում խաղաղության որևէ անկեղծ ձգտում ցուցաբերել»,- ասել է նա։
Թարգմանությունը՝ Էմմա Չոբանյանի
