Հունգարիայի հավաքականի և անգլիական «Լիվերպուլի» պաշտպան Միլոշ Կերկեզը ԱԱ-2026-ի ընտրական մրցաշարի F խմբի 5-րդ տուրի հանդիպման նախախաղային ասուլիսում կարծիք է հայտնել Հայաստանի հավաքականի մասին։
«Կարծում եմ՝ Հայաստանի հավաքականը լավ թիմ է, պայքարող։ Միշտ բարդ է խաղալ այդպիսի թիմերի դեմ։ Հիանալի է, որ առաջին խաղը բաց թողած Վարգան ու Շալային կկարողանան մասնակցել առաջիկա հանդիպմանը։ Նրանք կուժեղացնեն մեր խաղն առջևի գծում։
Այստեղ ենք եկել 3 միավորի հետևից։ Հավաքականում բոլորն ունեն լավ տրամադրություն։ Մենք մեկ ընտանիքի պես ենք, և պետք է դա ցուցադրենք խաղադաշտում։
«Մանչեսթեր Սիթիի» դեմ խաղում պարտվելուց հետո ես տխուր էի, սակայն դա անցյալում է։ Ես ուրախ եմ, որ հիմա այստեղ եմ և կենտրոնացած եմ Հունգարիայի հավաքականի վրա»,- ասել է 22-ամյա ֆուտբոլիստը։
Հայաստան – Հունգարիա հանդիպումը կկայանա նոյեմբերի 13-ին Վազգեն Սարգսյանի անվան «Հանրապետական» ստադիոնում ու կմեկնարկի ժամը 21։00-ին։ Այդ խաղից 3 օր անց Եղիշե Մելիքյանի գլխավորած թիմը Պորտուի «Դրագաու» ստադիոնում վերջին տուրի խաղը կանցկացնի Պորտուգալիայի հավաքականի հետ։
Հիշեցնենք, որ չորրորդ տուրից հետո ընտրական F խմբի առաջատարը Պորտուգալիայի հավաքականն է, որն ունի 10 միավոր։ Հունգարիան վաստակել է 5, Իռլանդիան՝ 4, իսկ խմբի հետնապահ Հայաստանը՝ 3 միավոր։
