Ղազախստանի խորհրդարանի ստորին պալատը միաձայն հաստատել է «ԼԳԲՏ քարոզչության» արգելքի օրենքը

Ղազախստանի Մաժիլիսը (խորհրդարանի ստորին պալատ) երկրորդ ընթերցմամբ հաստատել է «Արխիվային գործերի և անօրինական բովանդակության տարածման սահմանափակման մասին» օրենքը։ Ըստ էության, այն արգելում է «պեդոֆիլիայի և ոչ ավանդական սեռական կողմնորոշման քարոզչությունը» և վերցված է «ԼԳԲՏ քարոզչության» մասին ռուսական օրենքից։ Ռուսաստանում նմանատիպ օրենքն արդեն հարյուրավոր ԼԳԲՏ անձանց ստիպել է լքել երկիրը, գրում է Current time-ը։

Օրինագիծը ներկայացվել է «թվային տարածքում երեխաներին և դեռահասներին բացասական բովանդակությունից պաշտպանելու վերաբերյալ հանրային մտահոգության աճին ի պատասխան», փաստաթուղթը ներկայացնելիս ասել է  պատգամավոր Ելնուր Բեյսենբաևը։ Նա նշել է, որ փոփոխություններն արգելում են «պեդոֆիլիայի և ոչ ավանդական սեռական կողմնորոշման քարոզչությունը հանրային վայրերում» և ազդում են ինը հիմնական օրենքների վրա՝ երեխաների իրավունքների, գովազդի, հաղորդակցության, մշակույթի, կրթության, կինեմատոգրաֆիայի և զանգվածային լրատվամիջոցների մասին։

Փոփոխություններն ընդունվել են միաձայն։ Պատգամավորները նշել են, որ փոփոխությունների նպատակը «հանրային քարոզչության» սահմանափակումն է, այլ ոչ թե ԼԳԲՏ համայնքի իրավունքները վերացնելը։

«Ոչ ոք չի սահմանափակում նրանց անձնական իրավունքները։ Ներկայացված կանոնակարգերը սահմանում են նման տեղեկատվության հանրային տարածման սահմաններ, ինչը համապատասխանում է միջազգային ընդհանուր ընդունված պրակտիկային»,- հայտարարլ է Բեյսենբաևը։

Թարգմանությունը՝ Էմմա Չոբանյանի