Լոնդոնից զանգ Մոսկվա․ Բրիտանիայի վարչապետի խորհրդականը Պուտինի հետ կապ հաստատելու անհաջող փորձ է արել

Մեծ Բրիտանիայի վարչապետի ազգային անվտանգության հարցերով խորհրդական Ջոնաթան Փաուելը փորձել է կապ հաստատել Ռուսաստանի նախագահ Վլադիմիր Պուտինի հետ։ Այս մասին հաղորդում է Financial Times-ը, գրում է BBC-ի ռուսական ծառայությունը։

Լրատվամիջոցի աղբյուրների համաձայն՝ Փաուելն այս տարեսկզբին զանգահարել է Պուտինի արտաքին քաղաքականության  հարցերով օգնական Յուրի Ուշակովին: FT-ի աղբյուրները պարզաբանել են, որ Կրեմլի հետ կապ հաստատելու փորձի պատճառը Լոնդոնի մտահոգություններն էին՝ կապված ԱՄՆ նախագահ Դոնալդ  Թրամփի՝ Ուկրաինայի հարցում դիրքորոշման հետ։ Մեծ Բրիտանիան վախենում էր, որ Վաշինգտոնի քաղաքականությունը չի համապատասխանի եվրոպական երկրների շահերին:

Սակայն, ըստ FT-ի աղբյուրների, որ Փաուելի և Ուշակովի հեռախոսազրույցը միակն է եղել, բրիտանացի պաշտոնյան չի կարողացել Պուտինի մերձավոր շրջապատի հետ հաղորդակցության նոր ուղի բացել։ Աղբյուրներից մեկը նշել է, որ զրույցնը«այդքան էլ լավ չի անցել»։

Եվրոպացի պաշտոնյան ասել է, որ Փաուելի զանգը Մեծ Բրիտանիայի անկախ նախաձեռնությունն էր, որն աջակցություն է ստացել որոշ եվրոպական մայրաքաղաքների կողմից։ Բրիտանական կառավարությունը հաստատել է, որ Փաուելը փորձում էր ստեղծել հաղորդակցության ոչ պաշտոնական ուղի։

Կրեմլը նույնպես հաստատել է Լոնդոնի հետ շփումը։ Այս մասին հայտնել է Ռուսաստանի նախագահի մամուլի քարտուղար Դմիտրի Պեսկովը։

«Երկխոսությունը շարունակություն չի ստացել։ Փաստն այն է, որ այս շփման ընթացքում մյուս կողմը ցանկանում էր քննարկել եվրոպական դիրքորոշումը։ Իսկ մեր դիրքորոշումը լսելու մտադրությունն ու ցանկությունը բացակայում էին։ Իհարկե, հաշվի առնելով կարծիքներ փոխանակելու անհնարինությունը, երկխոսությունը զարգացում չի արձանագրել»,- ասել է Պեսկովը։