Հայաստանի ազգային հավաքականն առաջին մարզումն է անցկացրել ՀՖՖ Տեխնիկական կենտրոն/ ֆուտբոլի ակադեմիայում մեկնարկած մարզական հավաքի ընթացքում։
Արտասահմանում հանդես եկող մի քանի ֆուտբոլիստներ ազգային թիմին կմիանան նոյեմբերի 10-ին ու 11-ին։ Առաջին մարզմանը մասնակցել է նաև Հայաստանի հավաքականի նորեկ, Մոսկվայի ԲԿՄԱ-ի պաշտպան Արտյոմ Բանդիկյանը, որը ՀՖՖ մամուլի ծառայության հետ զրույցում պատմել է տպավորությունների մասին։
Հիշեցնենք, որ Հայաստանի հավաքականը պատրաստվում է Հունգարիայի և Պորտուգալիայի թիմերի դեմ ԱԱ-2026-ի ընտրական մրցաշարի F խմբի հանդիպումներին։ Եղիշե Մելիքյանի գլխավորած թիմը նոյեմբերի 13-ին Վազգեն Սարգսյանի անվան «Հանրապետական» մարզադաշտում կընդունի հունգարացիներին, իսկ 3 օր անց Պորտուի «Դրագաու» ստադիոնում վերջին տուրի խաղը կանցկացնի Պորտուգալիայի հավաքականի հետ։ Չորրորդ տուրից հետո ընտրական F խմբի առաջատարը Պորտուգալիայի հավաքականն է, որն ունի 10 միավոր։ Հունգարիան վաստակել է 5, Իռլանդիան՝ 4, իսկ խմբի հետնապահ Հայաստանը՝ 3 միավոր։
