28.04.2026 | 15:53
Կանադայի վարչապետը կմասնակցի Երևանում Եվրոպական քաղաքական համայնքի գագաթնաժողովին. հայտնի է՝ որ երկրներն են հրավիրված
ԱՄՆ սենատորները համաձայնության են եկել դադարեցնել պատմության մեջ ամենաերկար շաթդաունը
Քաղաքականություն
10.11.2025 | 10:34
ԱՄՆ երկկուսակցական սենատորները համաձայնության են եկել, որը թույլ կտա դադարեցնել երկրի պատմության մեջ ամենաերկար շաթդաունը։ Կառավարության աշխատանքում դադարը տևել է 40 օր։ ԱՄՆ կառավարությունը մասնակիորեն չէր աշխատում ավելի քան մեկ ամիս՝ Կոնգրեսի կողմից պետական ծառայությունների ֆինանսավորման վերաբերյալ համաձայնության չգալու պատճառով, գրում է BBC-ի ռուսական ծառայությունը։
Նախորդ ռեկորդը՝ 35 օր, գրանցվել էր Դոնալդ Թրամփի նախագահության առաջին ժամկետի ընթացքում և ավարտվել 2019 թվականի հունվարին։
«Կարծես թե մենք մոտենում ենք շաթդաունի ավարտին։ Դուք դրա մասին շատ շուտով կիմանաք»,- լրագրողներին ասել է ԱՄՆ նախագահ Դոնալդ Թրամփը։
Սենատորների համաձայնությունը շաթդաունի դադարեցման առաջին քայլն է։ Սենատի կողմից ընդունվելուց հետո օրինագիծը պետք է հաստատվի հանրապետականների կողմից վերահսկվող Ներկայացուցիչների պալատի կողմից, ապա ստորագրվի Թրամփի կողմից․ գործընթաց, որը կարող է տևել մի քանի օր։
Կոնգրեսը չէր կարողացել համաձայնության գալ ֆինանսավորման հարցում, քանի որ դեմոկրատները պնդում էին չեղարկել Medicaid-ի կրճատումները և երկարաձգել առողջության ապահովագրության հարկային արտոնությունները, որոնց ժամկետը լրանում է տարեվերջին, մինչդեռ հանրապետականները հրաժարվում էին։
Շաթդաունի դադարեցման դիմաց Սենատի մեծամասնության առաջնորդ Ջոն Թունը դեմոկրատներին խոստացել է դեկտեմբերին քվեարկել առողջապահության սուբսիդիաների երկարաձգման օգտին: Համաձայնությունը նաև նախատեսում է փակման ընթացքում ազատված դաշնային աշխատակիցների վերականգնում և փոխհատուցում:
Հոկտեմբերի 1-ից ի վեր գրեթե 1,5 միլիոն պետական ծառայողներ և զինվորականներ արձակուրդի են ուղարկվել կամ ստիպված են եղել աշխատել առանց վարձատրության:
Դաշնային ծառայությունների աշխատողների մեծ մասն անորոշ ժամանակով ուղարկվել է չվճարվող արձակուրդի։ Անհրաժեշտ աշխատողները շարունակում են աշխատել առանց վարձատրության։ Անցյալում նրանց վարձատրում էին հետին ամսաթվով՝ փակման ավարտից հետո։
Ֆինանսավորման բացակայության պատճառով նաև կրճատվել է ԱՄՆ բնակիչներին աջակցությունը, որոնք կախված են պարենային օգնությունից (օրինակ՝ սննդի կտրոններ):
Շաբաթ ԱՄՆ-ում ավելի քան 1400 չվերթ՝ թե՛ ներքին, թե՛ միջազգային, չեղարկվել էր այն բանից հետո, երբ ավիաընկերություններին այս շաբաթ հանձնարարվել էր կրճատել փոխադրման հզորությունները դաշնային կառավարության աշխատանքի դադարեցման ժամանակ:
Թարգմանությունը՝ Էմմա Չոբանյանի
