Սպերցյանը գոլ խփեց Հայաստանի հավաքականին միանալուց առաջ․ ՏԵՍԱՆՅՈՒԹ

Հայաստանի հավաքականի կիսապաշտպան Էդուարդ Սպերցյանը Ռուսաստանի չեմպիոն «Կրասնոդարի» կազմում գոլի հեղինակ է դարձել ազգային թիմին միանալուց առաջ։

Ռուսաստանի Պրեմիեր լիգայի 15-րդ տուրում կրասնոդարցիները 1։1 հաշվով են ավարտել Կալինինգրադի «Բալթիկայի» դեմ արտագնա հանդիպումը։ Էդուարդ Սպերցյանը գլխի հարվածով խաղի հաշիվը բացել է երրորդ րոպեին։ 63-րդ րոպեին Հայաստանի հավաքականի ավագը ստացել է դեղին քարտ, իսկ 79-րդ րոպեին փոխարինվել է։

Ռուսաստանի ընթացիկ առաջնությունում 25-ամյա կիսապաշտպանը 15 խաղում խփել է 6 գոլ ու կատարել 11 գոլային փոխանցում։ «Կրասնոդարը» 33 միավորով առաջատարն է, նույնքան միավոր ունի նաև երկրորդ տեղում գտնվող Մոսկվայի ԲԿՄԱ-ն։ Լավագույն եռյակը եզրափակող Սանկտ Պետերբուրգի «Զենիթը» հավաքել է 30 միավոր։

Առաջիկայում Էդուարդ Սպերցյանը կմիանա Հայաստանի հավաքականին, որը պատրաստվում է Հունգարիայի և Պորտուգալիայի թիմերի դեմ ԱԱ-2026-ի ընտրական մրցաշարի F խմբի հանդիպումներին։ Եղիշե Մելիքյանի գլխավորած թիմը նոյեմբերի 13-ին Վազգեն Սարգսյանի անվան «Հանրապետական» մարզադաշտում կընդունի հունգարացիներին, իսկ 3 օր անց Պորտուի «Դրագաու» ստադիոնում վերջին տուրի խաղը կանցկացնի Պորտուգալիայի հավաքականի հետ։ Չորրորդ տուրից հետո ընտրական F խմբի առաջատարը Պորտուգալիայի հավաքականն է, որն ունի 10 միավոր։ Հունգարիան վաստակել է 5, Իռլանդիան՝ 4, իսկ խմբի հետնապահ Հայաստանը՝ 3 միավոր։