12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Հայաստանն ու Խորվաթիան խորացրել են քաղաքական երկխոսությունն ու քննարկել համագործակցության հեռանկարները տարբեր ոլորտներում
Քաղաքականություն
07.11.2025 | 22:45
Նոյեմբերի 7-ին Երևանում տեղի են ունեցել Հայաստանի և Խորվաթիայի արտաքին գործերի նախարարությունների միջև քաղաքական խորհրդակցություններ, որոնց ընթացքում կողմերը քննարկել են երկկողմ հարաբերությունների զարգացման, տնտեսական և ոլորտային համագործակցության, ինչպես նաև տարածաշրջանային և միջազգային օրակարգի հարցերը:
Խորհրդակցությունները գլխավորել են Հայաստանի ԱԳՆ փոխնախարար Վահան Կոստանյանը և Խորվաթիայի արտաքին և եվրոպական գործերի նախարարության Եվրոպայի հարցերով պետքարտուղար Անդրեյա Մետելկո-Զգոմբիչը:
«Խորհրդակցությունների ընթացքում կողմերն անդրադարձել են վերջին տարիներին երկկողմ հարաբերությունների զարգացման դրական դինամիկային, բարձրաստիճան շփումներին՝ ընդգծելով դրանց կարևորությունը քաղաքական երկխոսության խթանման և տնտեսական համագործակցության ընդլայնման գործում։
Կողմերը քննարկել են ընդհանուր հետաքրքրություն ներկայացնող ոլորտներում, մասնավորապես՝ էներգետիկայի, նորարարական տեխնոլոգիաների, առողջապահության, գյուղատնտեսության, զբոսաշրջության և այլ բնագավառներում համագործակցության խորացման և զարգացման հեռանկարները, ինչպես նաև իրավապայմանագրային դաշտի ընդլայնման կարևորությունը:
Զրուցակիցներն անդրադարձ են կատարել նաև ՀՀ-ԵՄ գործընկերության խորացման ուղղությամբ ձեռնարկվող քայլերին, 2026թ. Հայաստանում կայանալիք Եվրոպական քաղաքական համայնքի 8-րդ գագաթնաժողովի նախապատրաստական աշխատանքներին: Ընդգծվել է նաև եվրոպական ինտեգրման փորձի ուսումնասիրման և փոխանակման կարևորությունը։
Մտքեր են փոխանակվել տարածաշրջանային և միջազգային օրակարգի մի շարք հարցերի շուրջ: Անդրադարձ է կատարվել Հայաստանի և Ադրբեջանի միջև օգոստոսի 8-ին Վաշինգտոնում ձեռք բերված պայմանավորվածություններին, ինչպես նաև Հայաստան-Թուրքիա հարաբերությունների կարգավորման գործընթացին»,- ասված է հաղորդագրությունում:
