Բաքվում շինծու նիստում դատախազը հայտարարել է, թե Արայիկ Հարությունյանի «մասնակցությունը հանցագործություններին հաստատված է ապացույցներով»

Բաքվի ռազմական դատարանում այսօր ընթանում է Արցախի ղեկավարների, պաշտոնյաների նկատմամբ հարուցված շինծու գործերով հերթական դատական նիստը։ Ադրբեջանական լրատվամիջոցների հաղորդմամբ՝ դատական ​​նիստը սկսվել է, իբր, հայ գերիների՝ «հանցավոր կազմակերպությանը մասնակցությունը հաստատող փաստաթղթերի և ապացույցների» ներկայացմամբ։

Ադրբեջանի գլխավոր դատախազի ավագ օգնական Վյուսալ Ալիևը դատարանի ուշադրությանն է ներկայացրել Արցախի նախկին նախագահ Արայիկ  Հարությունյանին վերաբերող որոշ փաստաթղթեր և ապացույցներ: Նշվել է, թե, իբր, դատական ​​նիստի ընթացքում հաստատվել են ապացույցներ, թե Արայիկ Հարությունյանի մասնակցությունը հանցագործություններին հաստատվում է «ապացույցներով»։ Արայիկ Հարությունյանը 1991 թվականի դեկտեմբերից մինչև 2023 թվականի սեպտեմբերի 20-ը, իբր, հանցավոր կազմակերպության կազմում (նկատի ունեն Արցախը) «տարբեր գործառույթներ կատարելիս, ուղղակիորեն և անուղղակիորեն մասնակցել է այդ հանցավոր կազմակերպության կողմից կատարված բոլոր հանցագործություններին»։

Նշվել է, թե իբր «ուսումնասիրված նյութերից մեկի համաձայն՝ հաստատվում է, որ Արայիկ Հարությունյանը, եղբոր հետ միասին, մասնակցել է 1990-ականներին Ադրբեջանի դեմ կատարված հանցագործություններին, ինչպես նաև Քյարքիջահան և Խոջալու բնակավայրերում տեղի ունեցած մարտերին»։

Նշվել է, թե դատարանում ուսումնասիրված տեսագրություններն ապացուցում են, որ Հարությունյանը ոչ միայն այցելել է «Հայաստանի զինված ուժերի կողմից նախկինում օկուպացված ադրբեջանական տարածքներ», այլև անմիջականորեն մասնակցել է մարտական ​​դիրքերի ստուգմանը, այնտեղ տեղակայված ուժերի ներուժի ուսումնասիրմանը և ռազմական գործողությունների շարունակականության ապահովմանն ուղղված գործողություններին։ Դա, իբր, ևս մեկ անգամ հաստատում է «նրա կարևոր դերը Ադրբեջանի  ինքնիշխանության և տարածքային ամբողջականության դեմ զինված ագրեսիայի տեղեկատվական, կազմակերպչական և կադրային աջակցության ապահովման գործում։ Նշվում է նաև, թե ադրբեջանական ժողովրդի, մասնավորապես՝ քաղաքացիական բնակչության դեմ բազմաթիվ հանցագործություններին և ահաբեկչական գործողություններին մասնակցելուց բացի, նա չէր ամաչել  իր գործողությունների մասին աշխարհին հաղորդել սոցիալական ցանցերի միջոցով»։

Դատական նիստը շարունակվում է։

Հավելենք, որ նախորդ նիստից մեկնարկել են դատախազների մեղադրական ճառերը։

Թարգմանությունը՝ Էմմա Չոբանյանի