Ադրբեջանի տարածքով Հայաստան ներկրված հացահատիկը ՍԱՏՄ-ն կստուգի 

Ադրբեջանի տարածքով Հայաստան ներկրված ռուսական հացահատիկից նմուշառում կիրականացվի և կուղարկվի բուսասանիտարական փորձաքննության, ինչպես արվում է ՀՀ ներկրվող նմանատիպ այլ բեռների դեպքում։ Այս մասին Factor.am-ին հայտնեցին Սննդամթերքի անվտանգության տեսչական մարմնից՝ հավելելով, որ բեռնափոխադրումը ԵՏՄ երկրների միջև է (Ռուսաստանից Հայաստան) և սահմանին հսկողություն չի կատարվում։

Հայաստանը հացահատիկ հիմնականում ներկրում է Ռուսաստանից՝ տարեկան 300-350 հազար տոննա։

«Ապավեն» բեռնափոխադրող ընկերության գործադիր տնօրեն Գագիկ Աղաջանյանը Factor.am-ի հետ զրույցում նշեց, որ սա նոր ուղի, նոր հնարավորություն է Հայաստանի համար։

«Սա տրանսպորտի այլ ուղի է, և դա, ամեն դեպքում, հետաքրքիր է մեզ համար։ Երկաթուղային կապ 30 տարուց ավելի Ռուսաստանի հետ չենք ունեցել։ Եվ դա ոչ միայն Ռուսաստան է, այլ նաև Միջին Ասիա»,- ասաց նա։

Մինչ այս, ցորենը Վլադիկավկազից Հայաստան էր բերվում բեռնատար մեքենաներով․ հեռավորությունը մինչև ՀՀ սահման շուրջ 250 կմ է։ Ըստ Աղաջանյանի՝ դեռ պետք է ուսումնասիրել և հաշվարկել, թե ո՞ր ճանապարհն է ավելի շահավետ։

Հիշեցնենք, որ Ադրբեջանի նախագահ Իլհամ Ալիևը 2025 թվականի հոկտեմբերի 21-ին հայտարարել էր, որ Ադրբեջանը վերացրել է Հայաստան բեռների տարանցման բոլոր սահմանափակումները: Դրանից հետո հացահատիկով բեռնված գնացքը Ռուսաստանից Ադրբեջանի և Վրաստանի տարածքով տարանցմամբ Հայաստան է տեղափոխել 15 վագոն՝ 1048 տոննա 800 կգ ընդհանուր քաշով հացահատիկով:

Գայանե Խաչատրյան