Անխնամ ու տրավմատիկ վիճակում են եկել.սպանված Տիգրանի քրոջն ու եղբայրներին տեղափոխել են ՀՕՖ-ի կենտրոն. ՏԵՍԱՆՅՈՒԹ

Ծափաթաղում սպանված 3-ամյա Տիգրանի քույրը և երեք եղբայրները ՀՕՖ-ի «Մարդիգյան» երեխաների պաշտպանության կենտրոն են տեղափոխվել անխնամ վիճակում։

Պաշտոնական նախնական վարկածով՝ 3-ամյա Տիգրանը տնից դուրս էր եկել իրենից ավագ եղբոր հետ։ Հետո ճանապարհին հանդիպել են հորը, և վերջինը խեղդելու ճանապարհով սպանել է երեխային։ 3-ամյա Տիգրան Օվանեսովի դին հայտնաբերվեց կիրակի՝ Ծափաթաղից մի քանի կմ հեռու Ջիլ գյուղի դաշտամիջյան հատվածում։ 

ՀՕՖ-ի երեխաների պաշտպանության կենտրոն է տեղափոխվել նաև Տիգրանի՝ խոսքի խնդիրներ ունեցող եղբայրը, որը, ըստ ամենայնի, ականատես է  եղել սպանությանը։ Կենտրոնի գործադիր տնօրեն Միրա Անտոնյանի խոսքով՝ երեխաները բոլորն էլ տրավմատիկ ու կաշկանդված վիճակում են։ Նրանցից ամենամեծը 12, իսկ ամենափոքրը՝ 5 տարեկան է։

«Կմնան, կադապտանան, կամաց-կամաց երեխաների հետ կսկսենք մասնագիտական աշխատանքները՝ մինչև հասկանանք, թե ինչ կլինի հաջորդ քայլը»,- նշում է Միրա Անտոնյանը։

Թե երեխաները որքան ժամանակ կմնան պաշտպանության կենտրոնում, դեռևս հայտնի չէ։ 

«Մեր կանխատեսումներով՝ ճիշտ կլինի, որ 6 ամիս ինտենսիվ աշխատանք տարվի երեխաների հետ, հետո կհասկանանք՝ պե՞տք է շարունակել, թե՞ արդեն կարիքը չի լինի»,- ասաց Անտոնյանը։

Իրավիճակի գնահատմամբ՝ վերջնական որոշումը պետք է կայացնի Գեղարքունիքի մարզպետարանի խնամակալության ու հոգաբարձության հանձնաժողովը։ Հենց այդ հանձնաժողովի նիստում էլ երեկ որոշվել էր երեխաներին անհապաղ տեղափոխել պաշտպանության կենտրոն։ Մարզպետարանի առողջապահության և սոցիալական հարցերի վարչության գլխավոր մասնագետ Մամիկոն Գալոյանն ասաց, որ մայրը դեմ չի եղել երեխաների տեղափոխմանը, ավելին՝ նա է Երևան ուղեկցել։ Նրա վստահեցմամբ՝ երեխաները կվերադարձվեն Ծափաթաղ։

Միրա Անտոնյանն էլ ասում է՝ առաջնային ու հիմնական օգնություն ստանալուց հետո երեխաները կարող են խնամատարներ ունենալ,  այսինքն՝ ցանկացողները նրանց կարող են ժամանակավոր խնամքի տակ վերցնել։

Օվանեսովներն ապրում են սոցիալապես ծանր պայմաններում․ սպանված Տիգրանի հորաքրոջ ընտանիքն էլ ձմռանն է նրանց տուն տեղափոխվում։ Հորաքրոջ երեխաները շարունակում են ապրել այդ պայմաններում։ Գեղարքունիքի մարզպետարանն ու Ճամբարակի համայնքապետարանը կքննարկեն նաև ընտանիքին աջակցություն տրամադրելու հարցը։

Մանրամասները՝ տեսանյութում։

Արփի Հակոբյան