Բելառուսը ՀԱՊԿ անդամների և Միութենական պետության դեմ ագրեսիան կհամարի իր դեմ հարձակում

Բելառուսը Միութենական պետության կամ ՀԱՊԿ անդամ որևէ երկրի դեմ զինված ագրեսիայի ակտը կհամարի իր դեմ հարձակում։ Այս մասին լրագրողներին ասել է Բելառուսի խորհրդարանի Ներկայացուցիչների պալատի ազգային անվտանգության հանձնաժողովի նախագահ Գենադի Լեպեշկոն, հայտնում է Սպուտնիկի բելառուսական ծառայությունը։

Այս դրույթը ներառված է «Ռազմական անվտանգության և պաշտպանության մասին օրենքներում փոփոխություններ կատարելու մասին» օրենքի նախագծում։ Այսօր այն կքննարկվի երկրորդ ընթերցմամբ։ Փաստաթղթում առաջարկվում են փոփոխություններ և լրացումներ պաշտպանության և զինված ուժերի մասին օրենքների փաթեթում։

«Բացի Համաբելառուսական ժողովրդական ժողովում ընդունված ռազմական դոկտրինին համապատասխան տերմինաբանության պարզաբանումից՝ ներմուծվում են նաև որոշ նոր տերմիններ և նոր նպատակներ։ Մասնավորապես, «Պաշտպանության մասին» օրենքը Բելառուսի վրա հարձակումը կսահմանի որպես պետության կամ պետությունների կոալիցիայի կողմից զինված ագրեսիայի ակտ, ոչ միայն Բելառուսի, այլև Բելառուսի և Ռուսաստանի Միութենական պետության կամ ՀԱՊԿ անդամ պետության դեմ»,- նշել է Լեպեշկոն։

Նա նաև նշել է, որ «Զինված ուժերի մասին» օրենքում ներմուծվում է լրացուցիչ նպատակ՝ զինված ուժերի մասնակցությունը ներքին հակամարտությունների կանխարգելմանը, իսկ եթե այդպիսիք սկսվեն, ապա դրանց լուծմանը։

Հանձնաժողովի ղեկավարը նշել է, որ «Ռազմական դրության մասին» օրենքում մի շարք նշանակալի փոփոխություններ են կատարվում, որոնք ազդում են Պաշտպանության նախարարության, Գլխավոր շտաբի և պետական ​​մարմինների լիազորությունների վրա։

«Մասնավորապես, Պաշտպանության նախարարությանը լիազորվում է վերլուծել պետության ներսում և դրսում զարգացող իրավիճակը և պատրաստել առաջարկություններ նախագահի և Զինված ուժերի գերագույն հրամանատարի համար՝ ռազմական դրություն մտցնելու և զինված պաշտպանության կազմակերպման, պետության պաշտպանության և պաշտպանության ապահովման վերաբերյալ»,- ասել է նա։

Հաղորդվում է նաև,  որ օրինագիծը երկրորդ ընթերցմամբ ընդունվել է։

Թարգմանությունը՝ Էմմա Չոբանյանի