31.10.2026 | 22:35
Հայաստանի ներկայացուցիչ Ալինա Չարաևան դուրս եկավ եզրափակիչ
ՀՀ քաղհասարակության ներկայացուցիչները կայցելեն Ադրբեջան. ԱԽ քարտուղար
Քաղաքականություն
03.11.2025 | 22:35
ՀՀ ԱԽ քարտուղար Արմեն Գրիգորյանը Բրյուսելում «Խաղաղության խաչմերուկ» կոնֆերանսի ժամանակ ասել է, որ մոտ ժամանակներս սպասվում է Հայաստանի քաղհասարակության ներկայացուցիչների այցը Ադրբեջան։
«Օրինակ՝ հոկտեմբերի 21-22-ը, առաջին անգամ, ադրբեջանական քաղաքացիական հասարակության ներկայացուցիչների պատվիրակությունն այցելեց Հայաստան՝ մասնակցելու երկկողմ կլոր-սեղան քննարկման։ Սպասվում է, որ Հայաստանի քաղաքացիական հասարակության ներկայացուցիչներն էլ մոտ ժամանակում փոխադարձ այց կկատարեն Ադրբեջան։ Քաղաքացիական հասարակության ներկայացուցիչների ներգրավումից առաջ Հայաստանի Ազգային անվտանգության ծառայության պետն այցելեց Բաքու՝ մասնակցելու Միջազգային անվտանգության ֆորումին։ Այսպիսի այցելությունները և փոխանակումները կնպաստեն փոխվստահության և փոխըմբռնման ամրապնդմանը երկու հասարակությունների միջև՝ միաժամանակ ամրապնդելով խաղաղությունը Հայաստանի և Ադրբեջանի միջև»,- ասել է Գրիգորյանը։
Հիշեցնենք՝ Հայաստանի և Ադրբեջանի փորձագիտական համայնքների ներկայացուցիչների նախաձեռնությամբ և երկու երկրների պաշտոնական կառույցների աջակցությամբ Երևանում տեղի էր ունեցել երկկողմ կլոր սեղան-քննարկում։ ԱԽ քարտուղար Արմեն Գրիգորյանը բարձր էր գնահատել Հայաստան-Ադրբեջան հարաբերությունների կարգավորման գործընթացի շրջանակներում նման ձևաչափն ընդգրկող հանդիպումների անցկացումը։
