Ադրբեջանում հեղաշրջման կազմակերպման գործով ևս մեկ անձ է ձերբակալվել

Պետական ​​հեղաշրջման փորձի մեջ մեղադրվող Ադրբեջանի նախագահի աշխատակազմի նախկին ղեկավար Ռամիզ Մեհդիևի գործով ձերբակալվել է Ադրբեջանի Գիտությունների Ազգային ակադեմիայի քարտուղարության նախկին ղեկավար Էլդար Ամիրովը։ Ադրբեջանական  իշխանամերձ Haqqin.az-ի հաղորդմամբ՝ Բաքվի Սաբաիլի շրջանային դատարանն Ամիրովին դատապարտել է չորս ամսվա կալանքի։

Նշենք, որ Ռամիզ Մեհդիևի՝ Ադրբեջանի նախագահի աշխատակազմի ղեկավարի պաշտոնում աշխատելու տարիներին Էլդար Ամիրովը եղել է այդ գերատեսչության աշխատակից, իսկ ավելի ուշ դարձել է նրա օգնականը։

Հավելենք, որ Բաքվի Սաբայիլի շրջանային դատարանն օրերս որոշում էր կայացրել Մեհդիևի դեմ հարուցված քրեական գործի վերաբերյալ։ Դատարանը, բավարարելով Ռամիզ Մեհդիևի նկատմամբ առանձնապես ծանր քրեական հանցագործությունների համար քրեական հետապնդում իրականացնելու միջնորդությունը, նրա նկատմամբ որպես խափանման միջոց էր ընտրել 4 ամիս ժամկետով տնային կալանքը։

Նրան մեղադրանք է առաջադրվել Ադրբեջանի քրեական օրենսգրքի 278.1 (պետական ​​իշխանությունը զավթելուն ուղղված գործողություններ), 274 (պետական ​​դավաճանություն) և 193-1.3.2 (հանցավոր ճանապարհով ձեռք բերված գույքի օրինականացում) հոդվածներով։ Ադրբեջանական ԶԼՄ-ները հայտնել էին, թե Ռամիզ Մեհդիևը ծրագրել է երկրի  նախագահ Իլհամ Ալիևի սպանությունը։ Ադրբեջանի նախագահական օդանավի փոխարեն, սակայն, խոցվել է AZAL-ի ինքնաթիռը։ Դրանից առաջ էլ հաղորդվել էր, թե Մեհդիևը փորձել է ՌԴ-ի աջակցությամբ հեղաշրջում պատրաստել։

Օրերս էլ ադրբեջանական լրատվամիջոցները հայտնել էին, որ Ադրբեջանի Պետական ​​անվտանգության ծառայությունը (ՊԱԾ) գործողություն է իրականացրել Hurriyet TV-ի խմբագրությունում։ Hürriyyət թերթի, համանուն hurriyyet.az կայքի և Hurriyyet TV հեռուստաալիքի գլխավոր խմբագիր Վուգար Մամեդովն է ձերբակալվել։ Նշվում էր, որ գործողությունը կապված է Ադրբեջանի նախագահի աշխատակազմի նախկին ղեկավար Ռամիզ Մեհդիևի հետ։ Դատարանը Մամեդովին դատապարտել է երեք ամիս և 13 օր ժամկետով նախնական կալանքի։

Թարգմանությունը՝ Էմմա Չոբանյանի