Հասարակություն
29.10.2018 | 19:52
Շիրակի մարզում «Դպրոցական սնունդ» ծրագրի կառավարումը և իրականացումը ՄԱԿ-ի Պարենի համաշխարհային ծրագրից (ՊՀԾ) ՀՀ կառավարությանը հանձման արարողության շրջանակում` ՀՀ կրթության և գիտության նախարարի պաշտոնակատար Արայիկ Հարությունյանն աշխատանքային հանդիպում է ունեցել ՄԱԿ-ի Պարենի համաշխարհային ծրագրի ( ՊՀԾ ) ներկայացուցիչ և Հայաստանում գրասենյակի տնօրեն Ելենա Միլոշևիչի, ՌԴ ֆինանսների նախարարության միջազգային ֆինանսական կապերի դեպարտամենտի տնօրենի տեղակալ Աննա Վալկովայի, ՌԴ Ճյուղային սննդի ինստիտուտի նախագահ Վլադիմիր Չերնիգովի հետ և «Կայուն դպրոցական սնունդ» հիմնադրամի տնօրեն Բագրատ Եսայանի հետ։
Արայիկ Հարությունյանը կարևորելով «Կայուն դպրոցական սնունդ» ծրագիրը և վերջինիս փոխանցումն ազգային ծրագրին՝ նշել է, որ մտադիր են շարունակել դպրոցական սննդի կազմակերպումը, քանի որ համոզված են` դպրոցներում կայուն սննդի ապահովումը նպաստում է կրթության արդյունավետության բարձրացմանը:
Նա շեշտել է, որ ՀՀ կառավարությունը նպատակ ունի շարունակել և զարգացնել ծրագիրը, ինչպես նաև «Կայուն դպրոցական սնունդ» հիմնադրամի գործունեությունը, որը համակարգում և մշտադիտարկում է ազգային ծրագրի իրականացումը:
Անդրադառնալով «Կայուն դպրոցական սնունդ» ծրագրի Հայաստանում արդյունավետ իրականացման և դրա հետագա գործունեության ֆինանսավորմանը` ՌԴ ֆինանսների նախարարության ներկայացուցիչ Աննա Վալկովան շեշտել է, որ ծրագրի առարկայական ձեռքբերումներից մեկը «Կայուն դպրոցական սնունդ» հիմնադրամն է, որը պատասխանատու է ծրագրի ողջ ընթացքի համար։ Իր հերթին, անդրադառնալով հիմնադրամի գործունեությանը, ՌԴ Ճյուղային սննդի ինստիտուտի տնօրեն Վլադիմիր Չերնիգովն ընդգծել է, որ ՊՀԾ-ն ավելի քան 70 երկրում իրականացնում է այս ծրագիրը և միայն Հայաստանում է, որ ազգային ծրագրին փոխանցվում է որպես ինստիտուցիոնալ կառույց, որը միավորում է ծրագրի բոլոր բաղադրիչները միաժամանակ և համախմբում համայնքային կառույցները:
Հանդիպման ընթացքում կողմերն անդրադարձել են ծրագրի իրականացման հետ կապված մի շարք տեխնիկական հարցերի :
