«Արևի մարդիկ»․ ժամանակակից բալետ՝ Օպերային թատրոնում

Ալ․ Սպենդիարյանի անվան ազգային ակադեմիական օպերայի և բալետի թատրոնում նոյեմբերի 10-ին կցուցադրվի «Արևի մարդիկ» ժամանակակից բալետային ներկայացումը․ հյատնում են թատրոնից։

«Այն ստեղծվել է խորեոգրաֆ Վալերիա Կասպարովայի և հայկական «Rozen Tal» ռոք խմբի հիմնադիր Արմեն Եդիգարյանի ստեղծագործական համագործակցության արդյունքում։

Այս ներկայացումը միավորում է բեմական շարժումը, կենդանի երաժշտությունը և հայկական ինքնությունը՝ ստեղծելով եզակի սինթեզ պարի ու ռոք երաժշտության միջև։ Խորեոգրաֆիան հիմնված է հայկական պարի հարուստ ավանդույթների վրա՝ ժամանակակից մեկնաբանությամբ, իսկ «Rozen Tal»-ի երաժշտությունը՝ հագեցած հզոր կիթառային ռիֆերով և մեղեդային շնչով, ընդգծում է պարի էմոցիոնալ խորությունը և դրամատուրգիան։

«Արևի մարդիկ» խորեոդրաման ներկայացնում է մարդու և արևի խորհրդանշական կապը՝ որպես հավատքի, հոգևոր լույսի ու վերածննդի աղբյուր։ Ներկայացումը խոսում է արմատներին վերադառնալու, ինքնության պահպանման և ապագայի հանդեպ վստահության մասին՝ ժամանակակից բալետի լեզվով:

««Արևի մարդիկ»՝ ներկայացումը հայ ժողովրդի ապագայի հանդեպ հավատքի խորհրդանիշն է, միասնության և համախմբվածության կոչ։ Այն հզոր մանիֆեստ է, որը միավորում է մարդկանց սրտերն ու հոգիները՝ հիշեցնելով, թե որքան կարևոր է վերադառնալ սեփական արմատներին, բայց միևնույն ժամանակ ստանձնել պատասխանատվություն սեփական կյանքի համար և հաստատ քայլել դեպի ապագա»,-նշում են նախաձեռնության հեղինակները»,- ասված է հաղորդագրությունում։