19.08.2026 | 20:54
Վարորդական չեք ստանա, եթե ավտոդպրոց չգնաք․ ՆԳՆ-ն մտադիր է նոր կանոններ սահմանել. ՏԵՍԱՆՅՈՒԹ
Թուրքիայի ԿԲ-ն չեղյալ է հայտարարել ռուսների շրջանում տարածված Papara վճարային համակարգի լիցենզիան
Քաղաքականություն
31.10.2025 | 21:47
Թուրքիայի Կենտրոնական բանկը որոշել է չեղարկել Papara վճարային ծառայության լիցենզիան, որը հաճախ օգտագործվում էր ռուսների կողմից: Տեղեկությունը հրապարակվել է Թուրքիայի պաշտոնական Resmi Gazete պարբերականում, գրում է The Insider-ը։
Փաստաթղթի համաձայն՝ ընկերության՝ որպես էլեկտրոնային փողի թողարկող գործելու թույլտվությունը, որը տրվել էր 2016 թվականի ապրիլի 21-ին, չեղյալ է հայտարարվել: Այս որոշման պաշտոնական հիմքը վճարային համակարգերի գործունեությունը կարգավորող թիվ 6493 տեղական օրենքի դրույթներն էին։
«Վեդոմոստի»-ի փոխանցմամբ՝ Papara ծառայությունը զգալի ժողովրդականություն է ձեռք բերել ռուսների շրջանում։ Սա տեղի է ունեցել այն բանից հետո, երբ ռուսական բանկային քարտերն այլևս չէին ընդունվում արտասահմանում։ Համակարգը թույլ էր տալիս Ռուսաստանի քաղաքացիներին հեռակա կարգով հաշիվներ բացել իրենց միջազգային անձնագրերով և գործարքներ կատարել։
Սա առաջին դեպքը չէ, որ թուրքական կարգավորող մարմինը չեղյալ է հայտարարում Ռուսաստանի քաղաքացիների շրջանում տարածված վճարային համակարգերի լիցենզիաները: 2025 թվականի մարտին Թուրքիայի Կենտրոնական բանկը (TCMB) ամբողջությամբ դադարեցրել էր մեկ այլ խոշոր համակարգի՝ Ininal-ի, ինչպես նաև Pay Fix-ի և Aypara-ի գործունեությունը։
Դա տեղի էր ունեցել խոշոր հետաքննությունից հետո. Ininal-ի սեփականատերը ձերբակալվել էր անօրինական խաղադրույքներից ստացված եկամուտները լվանալու կասկածանքով: Papara-ի նման՝ Ininal-ը նույնպես ակտիվորեն օգտագործվում էր ռուսների կողմից միջազգային ծառայությունների վճարումների համար, քանի որ այն թույլ էր տալիս հեռակա քարտ տրամադրել օտարերկրյա անձնագրի միջոցով։
Թարգմանությունը՝ Էմմա Չոբանյանի
