11.09.2026 | 21:05
Փրկարարները Ալավերդիում 15 մետր խորությունից դուրս են բերել արգելափակված օտարերկրացուն
Կիևը պնդում է, որ Ուկրաինայի հատուկ ծառայությունները ՌԴ-ի տարածքում ոչնչացրել են «Օրեշնիկ» հրթիռներից մեկը
Քաղաքականություն
31.10.2025 | 17:09
Ուկրաինայի անվտանգության ծառայության ղեկավարը հայտարարել է, որ երկրի հատուկ ծառայությունները Ռուսաստանի տարածքում ոչնչացրել են «Օրեշնիկ» հրթիռներից մեկը։ BBC-ի ռուսական ծառայության հաղորդմամբ՝ Ուկրաինայի անվտանգության ծառայության ղեկավար Վասիլ Մալյուկն այս մասին հայտարարել է երկրի նախագահ Վլադիմիր Զելենսկիի հետ համատեղ ճեպազրույցի ժամանակ։
Մալյուկը պարզաբանել է, որ սա տեղի է ունեցել 2023 թվականի ամռանը, երբ «Օրեշնիկ» հրթիռի գոյության մասին դեռևս հրապարակայնորեն չէր հայտարարվել:
«Դրանով զբաղվել են Ուկրաինայի անվտանգության ծառայությունը, Գլխավոր հետախուզական վարչությունը և Արտաքին հետախուզական ծառայությունը: Ոչնչացումը 100%-անոց էր, դա շատ հաջող գործողություն էր»,- հայտարարել է նա՝ նշելով, որ գործողության մասին այդ ժամանակ չի հրապարակվել, սակայն հաղորդվել է Ուկրաինայի նախագահին և համաշխարհային առաջնորդներին:
Վլադիմիր Զելենսկին և Վասիլ Մալյուկն ընդգծել են, որ հրթիռը ոչնչացվել է Ռուսաստանի տարածքում՝ Աստրախանի մարզի Կապուստին Յար զորավարժարանում: Ուկրաինայի նախագահը հայտարարել է, որ դա երեք առկա հրթիռներից մեկն է, և որ Ռուսաստանը, նրա խոսքով, պոտենցիալ ունակ է տարեկան արտադրել մինչև վեց նման հրթիռ։
«Օրեշնիկ» բալիստիկ հրթիռի մասին հայտնի էր դարձել 2024 թվականի նոյեմբերի 21-ից հետո, երբ Դնեպր քաղաքը հարձակման էր ենթարկվել։
Թարգմանությունը՝ Էմմա Չոբանյանի
