11.09.2026 | 22:15
Նոր կենսաչափական անձնագրերով սահմանային ստուգումը կտևի վայրկյաններ․ ՆԳ նախարար
ԱՄՆ-ը և Հնդկաստանը պաշտպանական ոլորտում համագործակցության 10-ամյա պայմանագիր են ստորագրել
Քաղաքականություն
31.10.2025 | 17:30
ԱՄՆ-ի և Հնդկաստանի պաշտպանության նախարարներ Փիթ Հեգսեթը և Ռաջնաթ Սինգհը պաշտպանության ոլորտում կարևոր համաձայնագիր են ստորագրել, գրում է DW-ի ռուսական ծառայությունը։
ԱՄՆ-Հնդկաստան պաշտպանական գործընկերությունն ամրապնդելու 10-ամյա շրջանակային համաձայնագիրը ստորագրվել է Մալայզիայում՝ Հարավարևելյան Ասիայի պետությունների ասոցիացիայի (ԱՍԵԱՆ) գագաթնաժողովում։ Հեգսեթն ասել է, որ պայմանագիրը «տարածաշրջանային կայունության և զսպման անկյունաքարն» է ու կնպաստի երկու երկրների միջև ավելի խորը համակարգմանը, հետախուզական տվյալների փոխանակմանը և տեխնոլոգիական համագործակցությանը։
«Սա կարևոր քայլ է մեր զինված ուժերի համար, ճանապարհային քարտեզ՝ հետագա ավելի խորը և ավելի իմաստալից համագործակցության համար»,- լրագրողներին ասել է Պենտագոնի ղեկավարը։
Իր հերթին, հնդիկ նախարարը բարձր է գնահատել ամերիկացի գործընկերոջ հետ «արդյունավետ հանդիպումը»։ Նա ընդգծել է, որ համաձայնագիրը «կսկսի նոր դարաշրջան» Հնդկաստանի և Միացյալ Նահանգների միջև պաշտպանական հարաբերություններում։ Սինգհը նշել է, որ ստորագրված փաստաթուղթն արտացոլում է երկու երկրների միջև «աճող ռազմավարական մերձեցումը» և կարևոր նշանակություն ունի Հնդկա-խաղաղօվկիանոսյան տարածաշրջանի համար։
Հնդկաստանի և Միացյալ Նահանգների հարաբերությունները սրվել էին այն բանից հետո, երբ ԱՄՆ նախագահ Դոնալդ Թրամփը 50% մաքսատուրք էր սահմանել հնդկական որոշ ապրանքների համար՝ Նյու Դելիի կողմից ռուսական նավթի ներմուծումը դադարեցնելուց հրաժարվելուց հետո։ Դրանից հետո Հնդկաստանը դադարեցրել էր ամերիկյան ռազմական տեխնիկայի գնումները։
Ռուսաստանի նավթային ոլորտի վրա ԱՄՆ նոր մաքսատուրքերի սահմանումից հետո լուրեր տարածվեցին, որ Հնդկաստանը դադարեցնում է Ռուսաստանից նավթի հետագա գնումները։ ԱՄՆ նախագահ Դոնալդ Թրամփը պնդում է, որ Հնդկաստանի վարչապետ Նարենդրա Մոդին իրեն վստահեցրել է դրանում։
Թարգմանությունը՝ Էմմա Չոբանյանի
