31.10.2026 | 22:55
Հայտնաբերվել է զինծառայողի դի. ՊՆ
Ուկրաինական ԱԹՍ-ները հարձակվել են Օրյոլի ՋԷԿ-ի վրա. ՌԴ ՊՆ-ն հայտնել է 130 ԱԹՍ-ի խոցման մասին. ՏԵՍԱՆՅՈՒԹ
Քաղաքականություն
31.10.2025 | 11:52
Ռուսաստանի ՀՕՊ ուժերը հետ են մղել ուկրաինական անօդաչու թռչող սարքերի հարձակումը Օրյոլի մարզի վրա։ Այս մասին հայտնել է նահանգապետ Անդրեյ Կլիչկովը, գրում է Meduza-ն։
Նրա խոսքով՝ խոցված անօդաչուների բեկորներն ընկել են Օրյոլ քաղաքում գտնվող ջերմաէլեկտրակայանի տարածքում՝ «վնաս պատճառելով էլեկտրամատակարարման սարքավորումներին»։ Նա հավելել է, որ «արագ միացվել են պահեստային գծերը», և էլեկտրամատակարարումը «գրեթե ամբողջությամբ վերականգնվել է»։ Ըստ Կլիչկովի՝ ՋԷԿ-ում տուժածներ կամ հրդեհներ չեն եղել։
Ավելի ուշ նահանգապետը պարզաբանել է, որ անօդաչու թռչող սարքի անկման հետևանքով վնասվել է ՋԷԿ-ի խողովակաշարը։ Սա կհանգեցնի քաղաքի Սովետսկի, Ժելեզնոդորոժնի և Սևերնի շրջաններում ջեռուցման ու տաք ջրի մատակարարման սահմանափակման։
Astra տելեգրամ ալիքի հաղորդմամբ էլ՝ անօդաչու թռչող սարքերը հարձակվել են Վլադիմիրի մարզի «Վլադիմիրսկայա» էլեկտրակայանի վրա: Նահանգապետ Ալեքսանդր Գուսևը հայտնել է, որ ուկրաինական անօդաչուների հարձակման հետևանքով տարածաշրջանում տուժածներ կամ ավերածություններ չկան:
Յարոսլավլի մարզի նահանգապետ Միխայիլ Եվրաևը, իր հերթին, հայտարարել է, որ Ֆրունզենսկի շրջանում երկու մանկապարտեզ կփակվի անօդաչու թռչող սարքի բեկորների անկման պատճառով։
Ռուսաստանի պաշտպանության նախարարությունը հայտնել է, որ գիշերը Ռուսաստանի շրջանների վրա որսացել և ոչնչացվել է ուկրաինական 130 անօդաչու թռչող սարք։ Կուրսկի մարզի վրա խոցվել է 31 անօդաչու թռչող սարք, Վորոնեժի մարզի վրա՝ 21, Բելգորոդի՝ 14, Բրյանսկի՝ 10, իսկ Օրյոլի, Տամբովի և Տուլայի մարզերի վրա՝ ինը անօդաչու թռչող սարք։ Հակաօդային պաշտպանության ուժերը նաև անօդաչուներ են ոչնչացրել Լիպեցկի, Յարոսլավլի, Ռոստովի, Վոլգոգրադի, Կալուգայի և Ռյազանի, Մոսկվայի մարզերի վրա։
Թարգմանությունը՝ Էմմա Չոբանյանի
