28.04.2026 | 21:00
ԲԱՆԱՎԵՃ․ Հիբրիդային հարձակումներ, միջամտություն ՀՀ-ի ներքաղաքական կյանքին․ ինչպե՞ս պայքարել
Բրիտանիայի թագավոր Չարլզ III-ը եղբորը զրկել է արքայազնի տիտղոսից՝ Էփշտեյնի հետ կապված սկանդալի պատճառով
Քաղաքականություն
31.10.2025 | 13:27
Մեծ Բրիտանիայի թագավորի կրտսեր եղբայրը՝ արքայազն Էնդրյուն, կզրկվի իր բոլոր տիտղոսներից և կհեռանա Վինձորի ամրոցի թագավորական նստավայրից: Չարլզ III թագավորը սկսել է Եղիսաբեթ II թագուհու երկրորդ որդուն պատվավոր կոչումներից, տիտղոսներից և պարգևներից զրկելու պաշտոնական գործընթացը, հայտարարել է Բուքինգեմյան պալատը, փոխանցում է DW-ի ռուսական ծառայությունը։
Հայտարարության մեջ նշվում է, որ արքայազն Էնդրյուին «պաշտոնական ծանուցում է ուղարկվել Royal Lodge նստավայրում վարձակալության պայմանագիրը դադարեցնելու մասին», և որ նա «կտեղափոխվի մասնավոր բնակության վայր»: BBC-ի փոխանցմամբ՝ Էնդրյուն կտեղափոխվի Նորֆոլկի Սանդրինգհեմի թագավորական կալվածք։
Բուքինգեմյան պալատը որոշման մասին հայտարարել է բրիտանական արքայազնի և ամերիկացի ֆինանսիստ Ջեֆրի Էփշտեյնի կապերի շուրջ սկանդալի ֆոնին, որը մեղադրվում է անչափահասների սեռական շահագործման մեջ։ 2019 թվականին Էփշտեյնը հայտնաբերվել է կախված իր բանտախցում։
«Այս միջոցառումները համարվել են անհրաժեշտ, չնայած նրա [Էնդրյուի] կողմից մեղադրանքների շարունակական հերքմանը։ Ձերդ գերազանցությունները ցանկանում են հստակեցնել, որ իրենց մտքերն ու խորը համակրանքը բոլոր տեսակի բռնության զոհերի և վերապրածների հետ են և կմնան»,- ասվում է հայտարարության մեջ։
Արքայական ընտանիքի անդամի բարեկամությունը Էփշտեյնի հետ կրկին ուշադրության կենտրոնում է հայտնվել Վիրջինիա Ջուֆրեի՝ հետմահու հրատարակվելիք հուշագրությունից հատվածների հրապարակումից հետո: Այնտեղ նա պնդում է, որ Էփշտեյնի կողմից մարդկանց թրաֆիքինգի զոհ է եղել և 17 տարեկանում սեռական հարաբերություն է ունեցել արքայազն Էնդրյուի հետ:
Ըստ Բուքինգեմյան պալատի՝ արքայազն Էնդրյուն այսուհետ կկոչվի Էնդրյու Մաունթբեթեն-Վինձոր։
Հոկտեմբերի սկզբին Էնդրյուն հայտարարել էր, որ հրաժարվել է Յորքի դուքսի տիտղոսից։ 2022 թվականին նա զրկվել էր իր տիտղոսների մեծ մասից և ազատվել թագավորական պարտականություններից։ Արքայազնի տիտղոսից զրկվելը նրան չի հեռացնում բրիտանական գահի հավակնորդների ցուցակից. նա հերթում ութերորդն է։
Թարգմանությունը՝ Էմմա Չոբանյանի
