Իրականության մեջ այսօր դատավորներն ավելի անկախ են, քան նախկինում․ Գագիկ Հարությունյան. ՏԵՍԱՆՅՈՒԹ

Այսօր լրագրողների հետ հանդիպմանը ԲԴԽ նախագահ Գագիկ Հարությունյանն անդրադարձավ նաև վարչապետի պաշտոնակատար Նիկոլ Փաշինյանի այն հայտարարություններին, որ որոշ քրեական գործի շրջանակներում դատավորները զանգահարում են իրեն, որպեսզի հասկանան, թե գործին ինչ ընթացք են տալու․ «Ես շատ կցանկանայի, որր ցանկացած պաշտոնյա նման հայտարարություն անելիս օրենքի պահանջը հաշվի առնի, եթե որևէ մեկը զանգում է կամ իրենք են զանգում՝ բարձրագույն խորհուրդը պետք է այդ մասին իմանա, որպեսզի օրենքով տրված իր գործառույթը կարողանա իրականացնել։ Ե՛վ նրանց նկատմամբ, ովքեր զանգում են, և՛ նրանց նկատմամբ, ում զանգել են։ Մենք, ելնելով այս խոսակցություններից, փորձում ենք ինչ-որ բան պարզել։ Բնականաբար, տվյալ դեպքում բոլորը հրաժարվում են՝ ասելով, որ իրենք չեն զանգել և ալն։ Բայց եթե խոսակցություններ կան, ինչպես ասում են՝ որ առանց կրակ ծուխ չի լինում, հնարավոր է, որ ինչ-որ մակարդակով զանգեր լինում են։ Իհարկե, դա դատապարտելի, հակաօրինական երևույթ է, դա հակասում է ոչ միայն Դատական օրենսգրքի պահանջին, այլև մեր՝ ապրիլի 12-ի որոշման պահանջին։ Ե՛վ զանգողը, և՛ զանգ ստացողը պարտավոր են ԲԴԽ-իմ տեղյակ պահել դրա մասին»,- ասաց Հարությունյանը։

Անդրադառնալով ՀՔԾ և ԱԱԾ պետերի գաղտնալսված հեռախոսազրույցում հնչեցվող դատավորի անվանը, ԲԴԽ նախագահն ասաց․ «Այդ դեպքում, երբ նշվում էր դատավորի անունը մենք հետաքրքրվեցինք և դատավորից բանավոր, հետո նաև գրավոր պահանջեցինք, որպեսզի ներկայացնի իրողությունը։ Դատավորը հայտարարեց, որ ինքը որևէ կոմունիկացիա չի ունեցել, որևէ մեկին չի զանգել։ Հետո, երբ արդեն ՀՔԾ-ն քրեական գործ հարուցեց, մենք այդքանով մեր աշխատանքն ավարտեցինք»։

Մանրամասները՝ տեսանյութում։