Ուկրաինային ինքնաթիռների մատակարարման վերաբերյալ բանակցություններ են ընթանում միաժամանակ Շվեդիայի, ԱՄՆ-ի և Ֆրանսիայի հետ. Զելենսկի

Ուկրաինայի նախագահ Վլադիմիր Զելենսկին հայտնել է, որ զուգահեռ բանակցություններ է վարում Շվեդիայի, Ֆրանսիայի և Միացյալ Նահանգների հետ՝ Կիևին ինքնաթիռների մատակարարման հարցով, գրում է BBC-ի ռուսական ծառայությունը։

Զելենսկին նշել է, որ Ուկրաինայի ռազմաօդային ուժերի ընդհանուր ապագա պահանջարկը 250 ժամանակակից ռազմական ինքնաթիռ է, այդ թվում՝ շվեդական Gripen, ամերիկյան F-16 և ֆրանսիական Rafale։

«Հաշվի առնելով մեր օդաչուների փորձը և թշնամու կարողությունները՝ սա Ուկրաինայի համար օպտիմալ ընտրություն է»,- ասել է նա՝ նշելով, որ շվեդական կործանիչները առաջնահերթություն են, քանի որ դրանք ամենաէժանն են արտադրության և պահպանման համար և կարող են կրել Ուկրաինային անհրաժեշտ զենքի մեծ մասը։

Զելենսկիի խոսքով՝ Շվեդիայի հետ արդեն նախնական համաձայնություն է ձեռք բերվել ոչ միայն Կիևին Gripen E մոդելի 150 միավոր մատակարարելու, այլև դրանց արտադրությունն Ուկրաինայում տեղայնացնելու վերաբերյալ։ Նախօրեին Financial Times-ը, հղում անելով Saab-ի ղեկավարությանը, հայտնել էր, որ իրենց արտադրող ընկերությունը ցանկանում է գործարան բացել Ուկրաինայում՝ ինքնաթիռի վերջնական հավաքման և փորձարկման, իսկ հետագայում՝ հնարավոր է՝ նույնիսկ մասնակի արտադրության համար։

Լրագրողների հետ հանդիպման ժամանակ Վլադիմիր Զելենսկին մեկնաբանել է նաև Լեհաստանի վարչապետ Դոնալդ Տուսկի հայտարարությունը։ Տուսկը նշել էր, թե իրենց վերջին զրույցի ժամանակ Զելենսկին, իբր, ասել է, որ Ուկրաինան «պատրաստ է կռվել ևս երկու-երեք տարի»։ Ուկրաինայի նախագահի խոսքով՝ իր խոսքերը վերաբերել են ոչ թե պատերազմի տևողության վերաբերյալ կանխատեսումներին, այլև գործընկերների կողմից Ուկրաինայի կայուն աջակցության ֆինանսական ռազմավարության մասին, մասնավորապես՝ սառեցված ռուսական ակտիվների օգտագործման միջոցով։

«Երբ ինչ-որ մեկն ասում է, որ Ուկրաինան պատրաստ է ևս մի քանի տարի կռվել, ես սա ընդգծել եմ բոլոր եվրոպացի առաջնորդներին՝ մենք տասնամյակներ չենք կռվի։ Բայց դուք պետք է ցույց տաք, որ ունակ եք կայուն կերպով աջակցել Ուկրաինային որոշակի ժամանակահատվածում»,- ասել է Զելենսկին։

Ուկրաինայի նախագահը հավելել է, որ եվրոպացի գործընկերները ներկայում մշակում են երկու-երեք տարվա ֆինանսական օգնության ծրագիր՝ քաղաքական փոփոխություններից անկախ շարունակական աջակցություն ապահովելու համար։

«Պատերազմը կարող է ավելի շուտ ավարտվել, բայց գումարը, ամեն դեպքում, անհրաժեշտ է՝ վերակառուցման, կայունության համար։ Դա այն մասին չէ, որ որևէ մեկն ուզում է կռվել, այլ այն մասին, որ Ուկրաինան չկորցնի դիմադրելու իր ունակությունը»,- եզրափակել է Զելենսկին։

Նա նաև հայտարարել է ուկրաինական նոր «Ֆլամինգո» և «Ռուտա» հրթիռների մարտական ​​կիրառման մասին։

««Ֆլամինգո»-ն օգտագործվել է մարտերում։ «Ռուտա»-ն  ունեցել է մարտական կիրառում։ Մենք անում ենք ամեն ինչ, որպեսզի այս տարի փորձենք ոչ թե մեկ, երկու կամ երեք, այլ լրջորեն փորձարկենք դրանք։ Մենք շարժվում ենք դեպի այդ կողմ։ Մենք հավատում ենք, որ կհաջողենք»,- ասել է Ուկրաինայի ղեկավարը։