11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Նա պետք է ավարտի պատերազմը, այլ ոչ թե հրթիռներ փորձարկի․ Թրամփն արձագանքել է Պուտինի՝ «Բուրեվեստնիկ» հրթիռի փորձարկման հայտարարությանը
Քաղաքականություն
27.10.2025 | 13:08
ԱՄՆ նախագահ Դոնալդ Թրամփը հայտարարել է, որ Ռուսաստանի նախագահ Վլադիմիր Պուտինը պետք է կենտրոնանա Ուկրաինայում պատերազմի դադարեցման, այլ ոչ թե հրթիռային փորձարկումների վրա, գրում է BBC-ի ռուսական ծառայությունը։
Թրամփն այսպես է մեկնաբանել միջուկային շարժիչով հրթիռների փորձարկումների մասին հաղորդագրությունները։ Նա հայտարարել է, որ Միացյալ Նահանգները նույնպես ունի միջուկային սուզանավեր, որոնք գտնվում են Ռուսաստանի մոտակայքում։
ՌԴ նախագահ Վլադիմիր Պուտինը կիրակի հայտարարել էր, որ Մոսկվան հաջողությամբ փորձարկել է իր միջուկային էներգետիկ «Բուրեվեստնիկ» թևավոր հրթիռը և կաշխատի դրա տեղակայման ուղղությամբ: Ռուս զինվորականները պնդում են, որ այն օդում մնացել է մոտ 15 ժամ և անցել շուրջ 14,000 կիլոմետր։
«Նրանք գիտեն, որ մենք ունենք միջուկային սուզանավ, աշխարհում ամենահզորը, որը գտնվում է իրենց ափերի մոտ։ Այսինքն՝ պարտադիր չէ, որ այն թռչի 8,000 մղոն։ Եվ, ի դեպ, չեմ կարծում, որ Պուտինը պետք է դա ասի։ Նա պետք է վերջ դնի պատերազմին։ Պատերազմը, որը պետք է տևեր մեկ շաբաթ, այժմ չորրորդ տարում է։ Եվ դա հենց այն է, ինչով նա պետք է զբաղվի, այլ ոչ թե հրթիռներ փորձարկի»,- լրագրողներին ասել է Թրամփը։
Հարցին՝ արդյո՞ք սպասվում են լրացուցիչ պատժամիջոցներ, Թրամփը պատասխանել է. «Կիմանաք»։
Թարգմանությունը՝ Էմմա Չոբանյանի
