11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Մեդվեդևը հայտարարել է, թե «խաղաղարար Թրամփը կանգնել է ՌԴ-ի հետ պատերազմի ճանապարհին»
Քաղաքականություն
23.10.2025 | 19:52
Միացյալ Նահանգները Ռուսաստանի գլխավոր հակառակորդն է, և նրա «խոսող խաղաղարարը»՝ նախագահ Դոնալդ Թրամփը, այժմ լիովին Ռուսաստանի դեմ պատերազմի ճանապարհին է։ Այս մասին հայտարարել է ՌԴ Անվտանգության խորհրդի փոխնախագահ Դմիտրի Մեդվեդևը տելեգրամի իր ալիքում։
Նա մատնանշել է Թրամփի վերջին գործողությունները՝ Բուդապեշտում Ռուսաստանի նախագահ Վլադիմիր Պուտինի հետ հանդիպումը չեղարկելն ու և նոր հակառուսական պատժամիջոցներ սահմանելը։
«Էլ ինչ։ Կլինեն նոր զենքե՞ր, բացի հայտնի Tomahawk-ներից»,- հարցադրում է արել նա։
Մեդվեդևը նշել է, որ հիմա սա Թրամփի հակամարտությունն է, այլ ոչ թե ԱՄՆ նախկին նախագահ Ջո Բայդենինը։ ՌԴ Անվտանգության խորհրդի փոխնախագահը ենթադրություն է հայտնել, որ Սպիտակ տան ղեկավարի վրա ճնշում է գործադրվում Կոնգրեսում, բայց և ընդգծել է, որ դա էությունը չի փոխում. դա «պատերազմական ակտ» է Մոսկվայի դեմ։
Հոկտեմբերի 22-ին Թրամփը ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ հայտարարել էր, որ չեղարկում է Բուդապեշտում Ռուսաստանի նախագահ Վլադիմիր Պուտինի հետ նախատեսված գագաթնաժողովը։ Նույն օրը ԱՄՆ ֆինանսների նախարարությունը հայտարարել էր, որ պատժամիջոցներ է սահմանում ռուսական երկու խոշոր նավթային ընկերությունների՝ «Ռոսնեֆտի» և «Լուկօյլի» նկատմամբ։
Թարգմանությունը՝ Էմմա Չոբանյանի
