Հնդկական ընկերությունները սկսել են վերանայել ՌԴ-ից նավթի մատակարարման պայմանագրերը՝ ԱՄՆ-ի նոր պատժամիջոցների պատճառով

Հնդկական ընկերությունները սկսել են վերանայել Ռուսաստանից նավթի մատակարարման պայմանագրերը՝ բացառելու «Ռոսնեֆտ»-ից և «Լուկօյլ»-ից գնումները՝ նրանց դեմ ԱՄՆ պատժամիջոցների սահմանումից հետո։ Այս մասին հաղորդում է Reuters՝ հղում անելով աղբյուրին, գրում է The Insider-ը։

Լրատվամիջոցի տվյալներով՝ պետական ​​Indian Oil Corp, Bharat Petroleum Corp, Hindustan Petroleum Corp և Mangalore Refinery and Petrochemicals-ը սկսել են Ռուսաստանի հետ պայմանագրերը վերանայել։

ԱՄՆ ֆինանսների նախարարության մամուլի հաղորդագրության համաձայն՝ բոլոր ընկերությունները պետք է դադարեցնեն ցանկացած գործարքները ռուս նավթ արտադրողների հետ մինչև նոյեմբերի 21-ը: Հնդկական ընկերությունները ստուգում են այդ ամսաթվից հետո ժամանելու համար նախատեսված ռուսական նավթի առաքման փաստաթղթերը՝ համոզվելու համար, որ այն ուղղակիորեն չի գալիս «Ռոսնեֆտ»-ից կամ «Լուկօյլ»-ից։

Միաժամանակ, ըստ ոլորտում աղբյուրների, հնդկական պետական ​​​​նավթավերամշակման գործարանները հազվադեպ են նավթ գնում անմիջապես «Ռոսնեֆտ»-ից կամ «Լուկօյլ»-ից։ Նրանք սովորաբար գնումներ են կատարում միջնորդների միջոցով։

Մինչև վերջերս Հնդկաստանը ռուսական նավթի երկրորդ խոշորագույն գնորդն էր Չինաստանից հետո, սակայն սկսեց կրճատել գնումները Միացյալ Նահանգների ճնշման տակ: Հնդկաստանի Nayara նավթավերամշակման գործարանը, որը կապված է «Ռոսնեֆտ»-ի հետ, հայտնվել էր  Եվրամիության և Մեծ Բրիտանիայի պատժամիջոցների տակ։

Օգոստոսին ԱՄՆ նախագահ Դոնալդ Թրամփը ստորագրել էր  գործադիր հրամանագիր, որով հնդկական ապրանքների վրա լրացուցիչ 25% մաքսատուրք էր սահմանվում՝ Հնդկաստանին ստիպելու դադարեցնել Ռուսաստանից նավթ գնելը: Հոկտեմբերին ամերիկացի առաջնորդը կրկին սպառնացել էր  Նյու Դելիին լ «մեծ» մաքսատուրքերի պահպանմամբ, եթե Հնդկաստանը չդադարի Ռուսաստանից էներգակիրներ գնել:

Թարգմանությունը՝ Էմմա Չոբանյանի