ՌԴ-ն դեմ է Թրամփի՝ ռազմաճակատի երկայնքով պատերազմը դադարեցնելու գաղափարին. Լավրով

Ռուսաստանի արտաքին գործերի նախարար Սերգեյ Լավրովը հայտարարել է, որ Ուկրաինայում անհապաղ հրադադարի կոչերը հակասում են Ալյասկայում ԱՄՆ և ՌԴ նախագահներ Դոնալդ Թրամփի և Վլադիմիր Պուտինի հանդիպման ժամանակ ձեռք բերված պայմանավորվածություններին։ Այս մասին նա ասել է Եթովպիայի արտաքին գործերի նախարար Գիդեոն Տիմոթեոսի հետ մամուլի ասուլիսի ժամանակ, գրում է Meduza-ն։

Լավրովի խոսքով՝ Ուկրաինայի նախագահ Վլադիմիր Զելենսկիի «եվրոպացի հովանավորներն ու տերերը» փորձում են համոզել ամերիկացիներին՝ փոխել իրենց դիրքորոշումը և հրաժարվել «երկարաժամկետ կարգավորման» ձգտումից։ Նա նշել է, թե «նման մոտեցումը բոլորովին հակառակն է այն բանի, ինչի մասին նախագահներ Թրամփը և Պուտինը համաձայնության են եկել Անքորիջում, երբ նրանք համաձայնել են կենտրոնանալ հակամարտության արմատական ​​պատճառների վրա»։

«Հիմա մենք Վաշինգտոնից լսում ենք, որ պետք է անհապաղ կանգնել, որ այլևս ոչինչ չպետք է քննարկենք։ Դադարեցրեք, և թող պատմությունը դատի։ Գիտեք՝ պարզապես դադարեցնելը կնշանակեր մոռանալ այս հակամարտության արմատական ​​պատճառները, որոնք ամերիկյան վարչակազմը, Դոնալդ Թրամփի իշխանության գալուց ի վեր, հստակ հասկացել է»,- ասել է Լավրովը։

Նա հավելել է, որ անհապաղ հրադադարը կնշանակի, որ Ուկրաինայի մեծ մասը «մնում է նացիստական ​​ռեժիմի տիրապետության տակ, և Ուկրաինայի այս հատվածը կլինի երկրի վրա միակ վայրը, որտեղ մի ամբողջ լեզու օրենքով արգելված է, չհաշված այն փաստը, որ այն ՄԱԿ-ի պաշտոնական լեզուն է և բնակչության մեծամասնության կողմից գործածվող լեզուն»։

Հոկտեմբերի 17-ին Վլադիմիր Զելենսկիի հետ բանակցություններից հետո ԱՄՆ նախագահ Դոնալդ Թրամփը հայտարարել էր, որ «ժամանակն է դադարեցնել սպանությունները և գործարք կնքել»։ Նա առաջարկել էր դադարեցնել ռազմական գործողություններն առաջնագծում, և որ Զելենսկին և Պուտինը հայտարարեն հաղթանակների մասին, ապա «թող պատմությունը դատի»։ Ուկրաինայի նախագահմ աջակցել է  Թրամփի առաջարկին։ Եվրոպացի առաջնորդները նույնպես կոչ են արել դադարեցնել ռազմական գործողությունները ներկայիս առաջնագծում։

Հոկտեմբերի 20-ին Լավրովը և ԱՄՆ պետքարտուղար Մարկո Ռուբիոն հեռախոսազրույց են ունեցել։ Մինչ այդ, CNN-ը հայտնել էր, որ նրանց նախատեսված հանդիպումը չեղարկվել է։ Լրատվամիջոցի աղբյուրը պնդել էր, որ Լավրովը և Ռուբիոն «տարբեր ակնկալիքներ» ունեն Ուկրաինայում պատերազմի ավարտի վերաբերյալ։ Ռուսաստանի արտաքին գործերի նախարարությունը հետագայում հայտարարել էր, որ հանդիպում նախատեսված չի եղել։

Թարգմանությունը՝ Էմմա Չոբանյանի