ՌԴ-ն հարվածել է Խարկովին և Պավլոգրադին․ ավելի քան երկու տասնյակ վիրավոր կա

Ռուսական ուժերը հոկտեմբերի լույս 21-ի գիշերը հարվածներ են հասցրել Ուկրաինային մի քանի շրջաններին։ Խարկովում տուժել է ինը մարդ։ Խարկովի քաղաքապետ Իգոր Տերեխովի խոսքով՝ ռուսական ուժերն ավիառումբերով հարվածել  են Արդյունաբերական շրջանին՝ վնասելով առնվազն 15 մասնավոր տուն։ Նա հավելել է, որ հարված է հասցվել նաև Նեմիշլյանսկի շրջանին, և հետևանքները պարզվում են, գրում է Current time-ը։

Չեռնիգովում և Չեռնիգովի հյուսիսային շրջանում ռուսական հարձակման հետևանքով էլեկտրամատակարարումը խափանվել է։

Պավլոգրադում վիրավորվել է տասնվեց մարդ, որոնցից չորսը ծանր վիճակում են։ Դնեպրոպետրովսկի մարզային ռազմական վարչակազմի ղեկավար Վլադիսլավ Գայվանենկոն հայտնել է, որ ռուսական բանակը հրթիռներով և անօդաչու թռչող սարքերով զանգվածային հարձակում է սկսել քաղաքի վրա։ Վնասվել են ենթակառուցվածքները։

Նիկոպոլում էլ հարվածի հետևանքով վնասվել են գյուղատնտեսական ընկերության շենքը, բազմահարկ շենք, երկու մասնավոր տուն, երկու օժանդակ շինություն, գազատար և էլեկտրահաղորդման գծեր։

Խերսոնը նույնպես գիշերը ենթարկվել է անօդաչու թռչող սարքերի հարձակման, որի հետևանքով վիրավորվել է երեք մարդ, հայտնել է շրջանային վարչակազմի ղեկավար Ալեքսանդր Պրոկուդինը։

Ուկրաինայի ռազմաօդային ուժերի հաղորդմամբ՝ ռուսական զորքերը հարձակվել են Ուկրաինայի վրա երկու «Իսկանդեր-Մ/ԿՆ-23» բալիստիկ հրթիռներով, չորս «C-300» զենիթային կառավարվող հրթիռներով և 98 անօդաչու թռչող սարքերով։ Նշվում է, որ «խոցվել/ճնշվել» է 58 անօդաչու թռչող սարք։