Քաղաքականություն
26.10.2018 | 19:34
Թուրքիայի արտաքին գործերի նախարար Մևլութ Չավուշօղլուն մասնակցել է «Թուրքիայի արտաքին քաղաքականության տեսլականը» վերտառությամբ կոնֆերանսին, որի ընթացքում խոսել է մի շարք օրակարգային հարցերի մասին. փոխանցում է ermenihaber.-ը:
Նա անդրադարձել է Թուրքիայի իշխանությունների կողմից մեղադրվող և հետապնդվող ամերիկաբնակ իսլամի քարոզիչ, թուրք միլիարդատեր Ֆեթուլլահ Գյուլենի հարցին, թուրք-ամերիկյան հարաբերություններին, ինչպես նաև Անկարայի կողմից ահաբեկչական համարվող կազմակերպություններին։
Թուրքիայի ԱԳՆ ղեկավարը նշել է, որ իրենք սկսել են Գյուլենի հանցանքն ապացուցող փաստերը ներկայացնել ԱՄՆ-ի Հետաքննությունների դաշնային բյուրոյին (FBI)։
«ԱՄՆ-ը հասկացավ, որ համառություն դրսևորելով Թուրքիայից չի կարող ինչ-որ բան ստանալ։ Թուրք-ամերիկյան հարաբերությունների լարվածության պատճառը ամերիկացի հոգևորական Բրանսոնը չէր։ Պատճառն այն էր, որ ԱՄՆ-ը դրական չի արձագանքում գյուլենական համայնքի վերաբերյալ մեր պահանջներին։ Մեզ անհանգստացնում է այն փաստը, որ Թուրքիայում ռազմական հեղաշրջման փորձ իրականացրած մարդը գտնվում է ԱՄՆ-ում։ Մենք սկսել ենք Գյուլենի մեղքը ապացուցող փաստեր ներկայացնել ԱՄՆ-ի Հետաքննությունների դաշնային բյուրոյին։ Բացի միջազգային պայմանագրերից, մենք ԱՄՆ-ի հետ ևս ունենք պայմանագիր։ Գյուլենական համայնքի առաջնորդին ինչո՞ւ մեզ չեք հանձնում»,- ասել է Չավուշօղլուն։
Վերջինս ԱՄՆ-ին մեղադրել է Թուրքիայում ահաբեկչական համարվող «Քուրդիստանի բանվորական կուսակցությանը» (ՔԲԿ-PKK) և Սիրիայի քրդական ուժերին աջակցելու համար։
Հիշեցնենք, որ Թուրքիայի իշխանությունները Գյուլենին մեղադրում են 2016թ. ռազմական հեղաշրջման փորձը նախաձեռնելու համար։ Անկարան շուրջ 2 տարի ԱՄՆ-ից պահանջում է արտահանձնել Գյուլենին, սակայն մինչ օրս նրանց պահանջը չի բավարարվել։
