Կլա՛ն է, եկեղեցո՞ւմ էլ է ԽԾԲ-ով, իր եղբայրը ՌԴ-ում է, քրոջ որդին՝ Արագածոտնում․ քաղբանտարկյալ չե՛ն․ Արսեն Թորոսյան. ՏԵՍԱՆՅՈՒԹ

Աշխատանքի և սոցիալական հարցերի նախարար, ՔՊ վարչության անդամ Արսեն Թորոսյանը Factor TV-ի հետ զրույցում անդրադարձել է երկրորդ նախագահ Ռոբերտ Քոչարյանի այն քննադատությանը, որ Փաշինյանը չի կարողացել օգոստոսի 8-ին ստանալ խաղաղության երաշխիք․ «Քոչարյանը մեր ունեցվածքը ՌԴ-ին է հանձնել, որ նա երաշխավորի՝ Ադրբեջանը չհարձակվի, դա՞ է իր երաշխիքը․ նա անցյա՛լ է, վե՛րջ, իր՝ գուբերնիա դառնալու իդեոլոգիան տեղ չունի ՀՀ-ում․ 10 անգամ ավելի պատասխան կտանք»,- ասաց Արսեն Թորոսյանը։

Սամվել Կարապետյանի փաստաբան Ամստերդամը քննադատել էր ՀՀ իշխանություններին, պնդելով՝ որ մեր երկրում քաղբանտարկյալներ կան։ «Հայաստանի դեմ գրոհելու ենք այնքան, մինչև Կարապետյանին ազատ արձակեն, քանի դեռ վարչապետ Փաշինյանը քաղաքական բանտարկյալներ է պահում, մենք գրոհելու ենք նրա դեմ և ամեն օր բարձրաձայնելու ենք այդ մասին։ Դրանից ավելի հրատապ հարց միայն Ադրբեջանում պահվող հայ պատանդներին ազատ արձակելն է»։

Արսեն Թորոսյանն ասում է․ «Ո՞վ է այդ Ամստերդամը, որ հարձակվում է ՀՀ-ի վրա․ փողն այնքան շատ է, անմեղսունակիների՞ են վարձում։ Սպիտակ միսիոնե՞ր են բերել մեզ վրա, ո՞վ է Ամստերդամը, որ հարձակվում է ՀՀ-ի վրա․ ի՞նչ իրավունք ունի ՀՀ ներքաղաքական իրավիճակի վերաբերյալ գնահատականներ հնչեցնի»։

Արսեն Թորոսյանը խոսել է նաև Գյումրիի սցենարը կրկնելով իշխանափոխություն իրականացնելու ընդդիմադիր ուժերի ծրագրերի, Կարապետյանի և Քոչարյանի ուժերի միջև հետընտրական կոալիցիայի հավանականության, ներքաղաքական այլ հարցերի մասին։

Հարցազրույցն ամբողջությամբ՝ տեսանյութում։

Ռոբերտ Անանյան