02.07.2026 | 20:24
ՔՊ խմբակցության ղեկավարի թեկնածու է ընտրվել Արուսյակ Մանավազյանը. Նիկոլ Փաշինյան. ՏԵՍԱՆՅՈՒԹ
Հայաստանի գործոնը կարևոր է ԵՏՄ-ի եվրոպական և մերձավորարևելյան ուղու համար. Տատյանա Վալովայա
Տնտեսություն
26.10.2018 | 13:34
Հայաստանի գործոնը կարևոր է ԵՏՄ-ի եվրոպական և մերձավորարևելյան ուղու համար: EADaily-ին տված հարցազրույցում այս մասին ասել է Եվրասիական տնտեսական հանձնաժողովի (ԵՏՀ) ինտեգրման և մակրոտնտեսության հարցերի նախարար Տատյանա Վալովայան:
«Դա միանգամայն իրատեսական է: Երբ ընթանում էին ԵՏՄ-ին Հայաստանի անդամակցության բանակցությունները, որպես առավելություններից մեկը դիտարկվում էր այն հանգամանքը, որ միանալով ԵՏՄ-ին՝ Հայաստանը կարող է օգտվել նաև Եվրամիության հետ հրաշալի հարաբերություններից, զարգացնել դրանք: Այն, որ Հայաստանը ԵՏՄ անդամ է, մեծացնում է երկրի ներդրումային գրավչությունը»,- նշել է ԵՏՀ պաշտոնյան՝ պատասխանելով Հայաստանի՝ ԵՏՄ-ի և ԵՄ-ի միջև կամուրջ դառնալու հնարավորության մասին հարցին:
Նույնը վերաբերում է նաև Մերձավոր Արևելքին. Վալովայայի խոսքով՝ Հայաստանն ինչ-որ առումով դառնում է ԵՏՄ-ի տնտեսական ֆորպոստն այդ տարածաշրջանում:
«Մենք Իրանի հետ շատ արագ համաձայնագիր ստորագրեցինք, ինչը, ըստ էության, ԵՏՄ-ին Հայաստանի անդամակցության արդյունք էր: Երբ Հայաստանը միացավ ԵՏՄ-ին, մենք Իրանի հետ հարաբերությունները զարգացնելու լրացուցիչ խթան ստացանք»,- հավելել է նա:
Տատյանա Վալովայան նշել է, որ 2015 թվականին ԵՏՄ-ն Եվրամիությանը պաշտոնապես առաջարկել է խորհրդակցություններ սկսել՝ փոխգործակցության ձևաչափ մշակելու համար, սակայն ԵՄ-ն շատ զուսպ է արձագանքել. «Մեզ, անկեղծ ասած, դա փոքր-ինչ զարմացնում է, քանի որ մենք տնտեսական միություն ենք և մեր գործընկերներին տնտեսական երկխոսություն ենք առաջարկում: Ցավոք՝ նրանք առայժմ դրան չեն համաձայնում»:
Հիշեցնելով, որ Հայաստանը ԵՄ-ի նոր Համաձայնագիր է ստորագրել, եվրոպական կառույցի հետ հարաբերություններն են բարելավում նաև Բելառուսն ու Ղազախստանը, Տատյանա Վալովայան հույս է հայտնել, որ հնարավոր կլինի ԵՄ-ի հետ փոխգործակցության ընդհանուր եզրեր գտնել:
