Զորամասերից ընտրությանը մասնակցած զինվորների թիվը չի բացահայտվի․ ԸՕ-ում փոփոխություն կկատարվի

Ազգային ժողովի պետական-իրավական և մարդու իրավունքների պաշտպանության հարցերի մշտական հանձնաժողովի նիստում այսօր քննարկվեց Ընտրական օրենսգրքում փոփոխություններ և լրացումներ կատարելու մասին օրենքի նախագիծը։

Ազգային ժողովի «Ծառուկյան» խմբակցության պատգամավոր Գևորգ Պետրոսյանն անդրադառնալով իրենց քաղաքական թիմի դիրքորոշմանը, ասաց․««Բարգավաճ Հայաստան» կուսակցությունը,  հավատարիմ մնալով արդեն իսկ ստորագրված հուշագրին, վերահաստատում է՝  ընտրությունները պետք է անցկացնել դեկտեմբեր ամսին և անպայման բարեփոխված Ընտրական օրենսգրքով։ Մեր համոզմամբ՝ բարեփոխված տարբերակը ապահովում է նախընտրական պայքարում քաղաքական կոմպոնենտի հզորացում, Ազգային ժողովում բազմազանություն, ուստի կոչ ենք անում հավանություն տալ ներկայացված նախագծին»։

Գևորգ Պետրոսյանը նաև նշեց, որ թեև այս նախագիծն անխոցելի չէ, սակայն այն առավելագույնս է ապահովում ժողովրդի իրական կամարտահայտությունը։

«Այն իր հիմնական կետերով հավակնում է առավելագույնս ապահովել ժողովրդի կամարտահայտությունն իր նպատակին հասնելու համար»,- ասաց պատգամավորը։

Հարակից զեկուցող, հանձնաժողովի նախագահ  Գևորգ Կոստանյանը նշեց, որ զուտ իրավական գնահատական է ցանկանում տալ կատարված փոփոխություններին և այդ համատեքստում կողմ է, որ Ընտական օրենսգրքի փոփոխություններին հանձնաժողովը կողմ քվեարկի։

Կառավարության ներկայացուցիչները առաջարկեցին  օրենսգրքի նախագծում կատարել փոփոխություն և հանել «այն ընտրական տեղամասերի համարները և գտնվելու վայրերը, որտեղ քվեարկում են զորամասերում կազմվող ընտրողների ցուցակներում ընդգրկված ընտրողները» բառերը։

Նախարարի պաշտոնակատար Արտակ Զեյնալյանը նշեց, որ առաջարկվող փոփոխությունն ունի պետական անվտագության խնդիր և նպատակ է հետապնդում զորամասերում զինվորների թիվը չբացահայտել։

«Վերլուծության արդյունքում ռեալ վտանգ կա, որ կբացահայտվի զորամասում ընտրություններին մասնակցած զինվորիների թիվը»,- ասաց նա։

Պետաիրավական հանձնաժողովը դրական եզրակացություն տվեց առաջարկվող փոփոխություններին և նախագծի վերաբերյալ առաջարկվող փոփոխություններն ընդունվեցին և այդ տարբերակով կքննարկվի ԱԺ լիագումար նիստում։