19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
Նիկոլ Փաշինյանը Դոնալդ Թրամփի և Աբդել Ֆաթթահ աս-Սիսիի հրավերով Եգիպտոս է մեկնում
Քաղաքականություն
12.10.2025 | 19:10
Վարչապետ Նիկոլ Փաշինյանը հոկտեմբերի 13-ին աշխատանքային այցով կմեկնի Եգիպտոսի Արաբական Հանրապետություն։
Փաշինյանի մամուլի քարտուղար Նազելի Բաղդասարյանը նշել է՝ Հայաստանի Հանրապետության վարչապետը, Ամերիկայի Միացյալ Նահանգների նախագահ Դոնալդ Թրամփի և Եգիպտոսի նախագահ Աբդել Ֆաթթահ աս-Սիսիի հրավերով, Շարմ Էլ Շեյխ քաղաքում կմասնակցի Մերձավոր Արևելքի Խաղաղության գագաթնաժողովին։
Հիշեցնենք՝ երկուշաբթի օրը ԱՄՆ-ն և Եգիպտոսը նախատեսում են անցկացնել գագաթնաժողով Շարմ էլ Շեյխում, որտեղ նախատեսվում է հանդիսավոր կերպով ստորագրել հրադադարի համաձայնագիրը Իսրայելի և ՀԱՄԱՍ-ի միջև։ Սպասվում է, որ միջոցառմանը կմասնակցեն 20 երկրների ղեկավարներ։ Գերմանիան կներկայացնի կանցլեր Ֆրիդրիխ Մերցը, իսկ Եվրամիությունը՝ Եվրոպական խորհրդի նախագահ Անտոնիու Կոշտան։
Մասնակցությունը հաստատել են նաև Ֆրանսիայի նախագահ Էմանուել Մակրոնը, ՄԱԿ-ի գլխավոր քարտուղար Անտոնիու Գուտերեշը, ինչպես նաև Բրիտանիայի վարչապետ Քիր Ստարմերը, Թուրքիայի նախագահ Ռեջեփ Թայիբ Էրդողանը և Հորդանանի թագավոր Աբդալլա II-ը։ Եգիպտոսում է նաև Ադրբեջանի նախագահ Իլհամ Ալիևը։
Իսրայելի և ՀԱՄԱՍ-ի միջև հրադադարի ռեժիմը Գազայի հատվածում ուժի մեջ է մտել հոկտեմբերի 10-ին, ուրբաթ օրը։ Ըստ 20 կետից բաղկացած խաղաղության ծրագրի՝ պատանդների և կալանավորների փոխանակումից հետո պետք է սկսվի բանակցությունների նոր փուլ՝ ուղղված պաղեստինա-իսրայելական երկարամյա հակամարտության վերջնական կարգավորմանը։
