Թուրքիան պատրաստվում է կրճատել ռուսական և իրանական գազի գնումները՝ շեշտը դնելով ԱՄՆ-ից հեղուկ բնական գազի ներկրման վրա

Թուրքիայի էներգետիկ ռազմավարությունը սպառնում է Ռուսաստանի և Իրանի դիրքերին միջազգային շուկայում. մինչև 2028 թվականը Անկարան մտադիր է իր գազի կարիքների կեսից ավելին բավարարել ներքին արտադրության և հեղուկ բնական գազի ներմուծման միջոցով, հիմնականում՝ Միացյալ Նահանգներից։ Այս մասին հայտնում է Reuters-ը՝ վկայակոչելով  պայմանագրային տվյալները:

Վաշինգտոնը հրապարակավ կոչ է արել իր դաշնակիցներին նվազեցնել էներգետիկ կախվածությունը Մոսկվայից և Թեհրանից, իսկ սեպտեմբերի վերջին Դոնալդ Թրամփը Սպիտակ տանը կայացած հանդիպման ժամանակ պահանջել էր, որ Ռեջեփ Թայիփ Էրդողանը կրճատի ռուսական գազի գնումները, գրում է The Insider-ը։

Ռուսաստանի մասնաբաժինը թուրքական գազի շուկայում վերջին 20 տարիների ընթացքում արդեն իսկ նվազել է՝ ավելի քան 60%-ից հասնելով 37%-ի։ Ռուսաստանի հետ «Կապույտ հոսք» և «Թուրքական հոսք» գազատարներով տարեկան 22 միլիարդ խորանարդ մետր գազ մատակարարելու երկարաժամկետ պայմանագրերը լրանում են առաջիկա տարիներին: Լրանում է նաև Իրանի հետ 10 միլիարդ խորանարդ մետր գազ մատակարարելու պայմանագիրը: Անկարան պատրաստ է երկարաձգել այդ պայմանագրերի մի մասը, սակայն ավելի փոքր ծավալներով և ավելի ճկուն պայմաններով:

Միևնույն ժամանակ, Թուրքիան արագորեն ընդլայնում է իր այլընտրանքային աղբյուրները: Պետական ​​TPAO-ն ավելացնում է արտադրությունն իր հանքավայրերում, իսկ հեղուկացված բնական գազի տերմինալները թույլ են տալիս տարեկան ներմուծել մինչև 58 միլիարդ խորանարդ մետր՝ գրեթե ամբողջ ներքին պահանջարկը: Սեպտեմբերին BOTAS-ը 20-ամյա պայմանագիր էր կնքել ամերիկյան Mercuria ընկերության հետ՝ որպես 43 միլիարդ դոլարի փաթեթի մաս:

Վերլուծաբանների հաշվարկներով՝ Անկարան կկարողանա օգտագործել ռուսական և իրանական գազը երկրի ներսում, միաժամանակ, վերարտահանելով ամերիկյան հեղուկ բնական գազը և սեփական արտադրության մի մասը դեպի Եվրոպա:

BOTAS-ը արդեն նախնական պայմանագրեր է ստորագրել Հունգարիայի և Ռումինիայի հետ՝ ձգտելով ապահովել Թուրքիայի կարգավիճակը՝ որպես տարածաշրջանային գազային կենտրոնի։

Թարգմանությունը՝ Էմմա Չոբանյանի