Մանրէներով բրդուճ․ ինչպե՞ս է «Զավիկի ղարսը» գործում, եթե կա կասեցման որոշում․ ՏԵՍԱՆՅՈՒԹ

Եթե Սարյան փողոցում գտնվող «Զավիկի ղարս» սննդի կետից վերջին օրերին օգտվել եք, ըստ ՍԱՏՄ-ի՝ առողջական խնդիրներ կարող եք ունենալ։ Տեսչական մարմինը երեկ հայտարարություն տարածեց, ըստ որի՝ Սարյան փողոցում գործող «Զավիկի ղարս» սննդի կետի բրդուճներում և մայոնեզում մանրէաբանական շեղումներ են հայտնաբերել։ Հաղորդագրության մեջ նշվում էր, որ կետի գործունեությունը կասեցվել է։  Չնայած դրան՝ Factor TV-ն թե՛ երեկ երեկոյան, թե՛ այսօր առավոտյան ֆիքսել է, որ սննդի կետը գործում է։ 

«Զավիկի ղարս» սննդի կետի տնօրենը չի ստորագրում իր օբյեկտի գործունեությունը կասեցնող որոշումը՝ հայտնում է ՀՀ սննդամթերքի անվտանգության տեսչական մարմնի խոսնակ Անուշ Հարությունյանը։ Ավելին՝ «Զավիկի ղարս» սննդի օբյեկտը երեկ հայտարարություն տարածեց, թե տեսչական մարմնի կողմից սննդի օբյեկտի աշխատանքը կասեցնելու մասին լուրերը կեղծ են, և իրենց բոլոր մասնաճյուղերը գործում են։

Իսկ ինչո՞ւ տնօրենը չի ստորագրում տեսչական մարմնի կասեցման որոշումը․ զանգահարեցինք սննդի օբյեկտի պատին փակցված հեռախոսահամարով: Մեզ հետ զրուցող անձը չներկայացավ, միայն նշեց, որ զանգի մասին տնօրենին տեղյակ կպահի, իսկ երբ ավելի ուշ զանգահարեցինք, պատճառաբանեց, թե մեր ձայնը լսելի չէ և անջատեց զանգը։

Տեսչական մարմնից փոխանցում են՝ օրենքի պահանջն է, որ արտադրական գործունեության կասեցման համար տնտեսվարողը պարտադիր պետք է ստանա կասեցման որոշումը։

Ըստ «Իրազեկ և պաշտպանված սպառող» ՀԿ հիմնադիր նախագահ Բաբկեն Պիպոյանի՝ անգամ եթե օրենսդրության մեջ որոշակի խոչընդոտ առաջացնող դրվագներ կան, նույն օրենսդրությունը հնարավորություն տալիս է այլ գործիքակազմեր կիրառելով՝ այդ խոչընդոտը հաղթահարել։

«Զավիկի ղարս» սննդի կետի դեպքը եզակի չէ։ Նախորդ տարվա փետրվարին գրել էինք, որ «Ջուլիս» սրճարանում սալմոնելայով սնունդ է մատուցվել, և չնայած տեսչական մարմնի կասեցման որոշմանը՝ հանարային սննդի օբյեկտը շարունակել է գործել։ Մի շարք քաղաքացիներ սուր աղիքային վարակով հայտնվել էին տարբեր բժշկական կենտրոններում, պարզվել էր, որ բոլորն էլ վարակվել էին «Ջուլիս»-ում մատուցված «մարինացված սաղմոն ձկից»։ 

ՍԱՏՄ-ն օրենքում փոփոխություն է առաջարկում, որպեսզի տեսչական մարմնի պաշտոնական էջի հրապարակումը համարվի պաշտոնական ծանուցում, և այդ պահից իսկ կասեցվի արտադրական օբյեկտի գործունեությունը։ Երբ կարող է օրենքի ուժ ստանալ այդ նախաձեռնությունը, հայտնի չէ։ Փաստ է, որ «Զավիկի ղարս» սննդի կետը շարունակում է աշխատել և վտանգել հաճախորդների առողջությունը։  

Մանրամասները՝ տեսանյութում։

Անի Թամրազյան