Հասարակություն
25.10.2018 | 18:49
ՀՀ Սահմանադրական դատարանը (ՍԴ) գրանցել է ԱԺ Կանոնակարգ օրենքում կատարված փոփոխության սահմանադրականության հարցով նախագահ Արմեն Սարգսյանի դիմումը։
Աղմկահարույց օրինագիծը, հիշեցնենք, Ազգային ժողովն ընդունեց հոկտեմբերի 2-ին հրավիրած արտահերթ նիստում:
Factor.am-ի հետ զրույցում ՍԴ մամուլի խոսնակ Մարիաննա Հակոբյանը նշեց, որ «Սահմանադրական դատարանի մասին» սահմանադրական օրենքի 26-րդ հոդվածի համաձայն՝ դիմումը գրանցվել և գտնվում է նախնական ուսումնասիրության փուլում։ Հանրապետության նախագահը Սահմանադրության 129-րդ հոդվածի 1-ին մասի, 169-րդ հոդվածի 1-ին մասի 4-րդ կետի և
Սահմանադրական դատարանի մասին Հայաստանի Հանրապետության սահմանադրական օրենքի 23-րդ հոդվածի 1-ին մասի համաձայն դիմել է Սահմանադրական դատարան Ազգային ժողովի՝ 2018 թվականի հոկտեմբերի 2-ի արտահերթ նիստում ընդունված «Ազգային ժողովի կանոնակարգ» Հայաստանի Հանրապետության սահմանադրական օրենքում լրացումներ և փոփոխություններ կատարելու մասին Հայաստանի Հանրապետության Սահմանադրական օրենքի 2-րդ հոդվածի 1-ին մասով նախատեսված 50-րդ հոդվածի 6-րդ մասի 2-րդ և 3-րդ կետերի Հայաստանի Հանրապետության Սահմանադրության 149-րդ հոդվածի 2-րդ և 3-րդ մասերին համապատասխանության հարցը որոշելու վերաբերյալ:
«ՍԴ աշխատակարգի 27-րդ կետի 2-րդ մասի համաձայն՝ այս գործերով դիմումի նախնական ուսումնասիրությունը պետք է ավարտվի դիմումը մուտքագրելուց հետո 20-օրյա ժամկետում։ Սահմանադրական դատարանը որոշումն ընդունում է դիմումը մուտքագրելուց ոչ ուշ, քան երեք ամիu անց: Uահմանադրական դատարանի՝ պատճառաբանված աշխատակարգային որոշմամբ՝ գործի քննության ժամկետը կարող է երկարաձգվել, բայց ոչ ավելի, քան երեք ամuով»,- հավելեց Մարիաննա Հակոբյանը:
Հիշեցնենք, որ նախագահ Արմեն Սարգսյանը հոկտեմբերի 23-ին հայտարարություն էր տարածել հոկտեմբերի 2-ին ընդունված ԱԺ Կանոնակարգ օրենքում լրացումներ և փոփոխություններ կատարելու մասին օրենքի վերաբերյալ՝ արձանագրելով, որ փոփոխություններում, ինչպես նաև ԱԺ Կանոնակարգ օրենքում առերևույթ սահմանադրաիրավական խնդիրներ կան: Օրենքի սահմանադրականության հարցը որոշելու համար հանրապետության նախագահը ՍԴ էր դիմել:
