Քաղաքականություն
25.10.2018 | 17:48
Լրագրող Ջամալ Խաշոգջիի սպանությունը նախապես ծրագրված է եղել: Այս մասին հայտարարել է Սաուդյան Արաբիայի գլխավոր դատախազ շեյխ Սաուդ ալ-Մուաջիբը, գրում է ՏԱՍՍ-ը՝ վկայակոչելով Al Ekhbatiya հեռուստաալիքը:
«Խաշոգջիի գործով կասկածյալները կանխամտածված են գործել»,- ասել է ալ-Մուաջիբը:
Նա նաև նշել է, որ դատախազությունը թուրք-սաուդյան հետաքննչական համատեղ խմբի ներկայացրած տվյալներ է ստացել. «Հետաքննությունը շարունակվելու է»:
Միաժամանակ, Թուրքիայի ԱԳ նախարար Մևլութ Չավուշօղլուն հայտարարել է, որ Անկարան սաուդցի լրագրողի սպանության գործով միջազգային հետաքննության կարիք չի տեսնում՝ ընդգծելով, որ գործի քննությունը պետք է կատարվի թուրքական օրենսդրությամբ:
Նա հավելել է, որ Էր Ռիադն Անկարայի որոշ հարցերի դեռ չի պատասխանել. «Մարմինը դեռևս չի գտնվել: Եթե դուք ընդունում եք սպանությունը, ինչո՞ւ չեք ասում՝ որտեղ է մարմինը»:
Հիշեցնենք, որ Էր Ռիադի քաղաքականության քննադատությամբ հանդես եկող ընդդիմադիր լրագրող Ջամալ Խաշոգջին հոկտեմբերի 2-ին Ստամբուլում Սաուդյան Արաբիայի գլխավոր հյուպատոսություն մուտք գործելուց հետո անհետացել է: Ավելի ուշ սաուդյան իշխանությունները հայտարարեցին, որ լրագրողը դիվանագիտական ներկայացուցչության շենքում ծագած կոնֆլիկտի ժամանակ սպանվել է: Գործով թագավորության 18 հպատակ է անցնում, որոնց անունները, սակայն, չեն բացահայտում:
