Վաղարշապատի ընտրություններին մասնակցելու ենք առանձին․ Վանեցյանի թիմի արձագանքը՝ Սամվել Բաբայանի հայտարարությանը

«Հայրենիք» կուսակցության խոսնակ Սոս Հակոբյանը պատասխանել է Արցախի ՊԲ նախկին նախարար Սամվել Բաբայանի այն հայտարարությանը, որ Վաղարշապատի ընտրություններում համագործակցելու է Արթուր Վանեցյանի ղեկավարած «Հայրենիք» կուսակցության հետ։

«Լրատվամիջոցների բազմաթիվ ներկայացուցիչների հարցադրումներին ի պատասխան պարզաբանում ենք․
Վաղարշապատ խոշորացված համայնքի ընտրություններում Սամվել Բաբայանի կողմից մեր թեկնածուին աջակցելուն հարգանքով ենք վերաբերվում։

Դրանից դուրս որևէ քննարկում չենք ունեցել։

Մենք շնորհակալ ենք բոլոր այն ընդդիմադիր ուժերին, որոնք Վաղարշապատի ընտրություններում մեզ աջակցում են կամ կցանկանան աջակցել։

Մենք վերահաստատում ենք մեր դիրքորոշումը, որ այս իշխանության դեմ իրական պայքարող ցանկացած ուժի հետ պատրաստ ենք ունենալ քննարկումներ և համագործակցություն։

Յուրաքանչյուր մարդու, այդ թվում՝ Սամվել Բաբայանի իրավունքն է աջակցել այս կամ այն թեկնածուին, և մենք ուրախ ենք, որ Սամվել Բաբայանը Էջմիածնում աջակցում է հենց Խաչիկ Մանուկյանին։
Մենք հայտարարել ենք, որ ընտրություններին մասնակցելու ենք առանձին։ Մինչ այս պահը որևէ փոփոխություն այդ առումով տեղի չի ունեցել, իսկ խորհրդակցություններ մշտապես ունեցել ենք և կշարունակենք ունենալ ընդդիմադիր մյուս ուժերի հետ»,- գրել է խոսնակը։

«Էջմիածնում փորձենք, եթե նորմալ եղավ, հետո «դալշեն» կերևա։ Հասարակությունն ուզում է, որ ուժերը միանան, հենց միանում ենք՝ ասում են սերժական է»,- ասել էր Սամվել Բաբայանը՝ պատասխանելով այն հարցին, թե Արթուր Վանեցյանի հետ գաղափարական ինչ ընդհանրություններ ունեն։