Սամվել Բաբայանն ու Արթուր Վանեցյանը կհամագործակցեն

Արցախի նախկին ՊԲ հրամանատար Սամվել Բաբյանի ղեկավարած ուժը Վաղարշապատի ընտրություններում համագործակցելու է Արթուր Վանեցյանի ղեկավարած «Հայրենիք» կուսակցության հետ։ Այս մասին Factor.am-ի հետ զրույցում ասաց Սամվել Բաբայանը։

«Էջմիածնում փորձենք, եթե նորմալ եղավ, հետո «դալշեն» կերևա։ Հասարակությունն ուզում է, որ ուժերը միանան, հենց միանում ենք՝ ասում են սերժական է»,- ասաց Բաբայանը։ Սամվել Բաբայանից հետաքրքրվեցինք՝ Արթուր Վանեցյանի հետ գաղափարական ինչ ընդհանրություններ ունեն։

«Մենք պետք է բոլորի հետ համագործակցենք, որ Հայաստանը տարանցիկ երկիր լինի և որ սոցալական հարցերը լուծվեն։ Այս կետերն են, որ մեզ կապում են»,-ասաց նա։

Սամվել Բաբյանինի հիշեցրեցինք, որ Վանեցյանը համագործակցել է Քոչարյանի, Սերժ Սարգսյանի հետ, արդյո՞ք սա չի խանգարում համագործակցությանը։

«Հայաստանում չկա մի քաղաքական ուժ, որ անթերի անցյալ ունենա։ Օրինակ՝ Նիկոլը համագործակցել է, թե Սերժի հետ, թե Քոչարյանի հետ, թե Արման Սարգսյանի հետ։ Հիմա ի՞նչ կապ ունի․․․ Մարդ է, ինչ կապ ունի, երիտասարդ է, սխալվել է, կամաց-կամաց շտկվում է»,-ասաց նա։

Սամվել Բաբայանը նշում է, որ եթե Վաղարշապատում համագործակցությունը հաջող ստացվի, ապա նույն ձևաչափով նաև համապետական ընտրություններին կմասնակցեն։

«Ասել եմ՝ կարող է և լինի վարչապետի թեկնածու։ Ես ինքս ինձ վարչապետի թեկնածու չեմ տեսնում։ Այսօր մեր համագործակցությունը միայն Վաղարշապատի ընտրությունների շրջանակներում նայեք։ 2026-ի հետ կապված որևէ քննարկում չենք ունեցել։ Վաղարշապատիօց հետո կտեսնենք, թե մեզ ինչպես է հասարակությունն ընդունում»,-ասաց նա։

Թեմայի շուրջ փորձեցինք պարզաբանում ստանալ նաև Արթուր Վանեցյանից, սակայն, նա մեր զանգերին չպատասխանեց։

Նարեկ Կիրակոսյան