04.09.2026 | 23:57
Էդուարդ Սպերցյանի գոլն օգնեց «Ալ Ահլիին» վստահ հաղթանակ տանել. ՏԵՍԱՆՅՈՒԹ
Սոֆիայի Theatro թատրոնում կայացել է մի հայ ընտանիքի ճակատագրի մասին պատմող «Ճանապարհ» պարային ներկայացումը
Մշակույթ
25.10.2018 | 17:01
Հոկտեմբերի 20-ին Սոֆիայի Theatro թատրոնում կայացավ «Ճանապարհ» պարային թատերականացված ներկայացումը, որի հիմքում ընկած էր մի հայ ընտանիքի ճակատագրի մասին պատմող իրական պատմությունը:
Պարային արվեստի արտահայտչական ձևերով և բանաստեղծական լեզվով համահյուսված այս պատմությունը ներկայացման գլխավոր հերոսուհու՝ հայ տարեց տիկնոջ հիշողությունների վերապրումն էր, որոնցով նա կիսվում է իր թոռների հետ: Ուրախ և երջանիկ մանկությունն ու առաջին սերը, ցեղասպանության ողբերգությունն ու հայ ժողովրդի վերածնունդը, Բուլղարիայում գտած փրկությունն ու նոր օջախի ջերմությունը, պատմական հայրենիքի հավերժությունն արտացոլող հիշողությունները մարմնավորվել էին «Ուզունդարա», «Նազանի», «Հովիվների պար», «Շալախո», «Ադանա», «Ղափամա», «Բերդ» և այլ պարային համարներում, ինչպես նաև մի շարք բանաստեղծություններում:
Որպես հայ և բուլղարացի ժողովուրդների միասնության ու բարեկամության արտահայտում, ներկայացմանը հանդես էին գալիս Սոֆիայի հայկական «Նաիրի» պարային համույթի և բուլղարական «Էստրեյա» բալետային խմբի մոտ 50 մասնակիցներ: Միաժամանակ ցուցադրվում էին երկու ժողովուրդների ազգային ավանդական տարազներ, որոնց թվում էին նաև Հայաստանի բարձրորակ վարպետների ձեռագործ նմուշներ:
Միջոցառմանը մասնակցում էր Բուլղարիայում ՀՀ դեսպան Արմեն Սարգսյանը, ինչպես նաև Բուլղարիայի հայ համայնքի բազմաթիվ ներկայացուցիչներ:
