«Պրիվետ Ռոբ» արտահայտությունը չեմ լսել. Ռոբերտ Քոչարյան․ ՏԵՍԱՆՅՈՒԹ

«Ես մեր տանն եմ եղել, երբ այդ դեպքը տեղի է ունեցել։ Դեպքը կատարվել է այդ սրճարանը լքելուց մոտ 40 րոպե հետո, դա քրեական գործում է, նախագահի՝ իմ թիկնազորն այլևս այդ տարածքում չի եղել։ Ինձ առավոտն են զեկուցել այդ մասին»,- այս մասին հրավիրված ասուլիսի ժամանակ հայտնեց ՀՀ երկրորդ նախագահ Ռոբերտ Քոչարյանը՝ անդրադառնալով 2001 թվականին Պողոս Պողոսյանի սպանության գործին։
Քոչարյանի պնդմամբ՝ ինքը «Պրիվետ Ռոբ» արտահայտությունը չի լսել։

«Ես չգիտեի՝ ինչ է այնտեղ կատարվել, որ ինչ-որ մեկը մի քիչ քեֆը լավ վիճակում վիճաբանություն է եղել, ռազբորկա, և միջադեպը կատարվեց։ Մերս էլ է ինձ Ռոբ ասել միշտ, տիկին Բելլան միշտ Ռոբ է ասում տանը, իմ մանական ընկերները ինձ Ռոբ են ասում։ Ինչի՞ պիտի դրանից նեղանամ»,- հայտարարեց Ռոբերտ Քոչարյանը։
Նշենք, որ Երևանի քրեական դատարանում շարունակվում է շուրջ 25 տարի առաջ Առագաստ սրճարանում տեղի ունեցած, Պողոս Պողոսյանի սպանության գործի քննությունը:

Հիշեցնենք, որ Պողոս Պողոսյանը սպանվել է 2001 թվականի սեպտեմբերի 24-ի լույս 25-ի գիշերը։ Այդ օրը Հայաստանի երկրորդ նախագահ Ռոբերտ Քոչարյանն այցելել է սրճարան և, ըստ գործում առկա տվյալների, Պողոս Պողոսյանը, նրան տեսնելով, ասել է՝ «պրիվետ Ռոբ», ինչն էլ դարձել է Քոչարյանի թիկնապահների հետ վիճաբանության պատճառ։ Դեպքի առթիվ 2001 թվականին քրեական գործ է հարուցվել ՀՀ նախկին Քրեական օրենսգրքի 103-րդ հոդվածով, այսինքն՝ հանցավոր անփութությամբ անզգույշ սպանություն կատարելը, Աղամալ Հարությունյանը մեղավոր է ճանաչվել ու դատապարտվել։ Դեպքի վերաբերյալ, սակայն, Հայաստանում տեղի ունեցած իշխանափոխությունից հետո Դատախազությանն ուղարկված դիմումով նոր հանգամանքներ են ներկայացրել Սթիվեն Նյուտոնի ներկայացուցիչները:

Մանրամասները՝ տեսանյութում։

Մանյա Պողոսյան