Անհասկանալի է՝ սեռական փոքրամասնությունների մասին հարցերն ինչո՞ւ են հրատապ դարձել այսօրվա Հայաստանում․ Փաշինյան․ ՏԵՍԱՆՅՈՒԹ

Կառավարության հոկտեմբերի 25-ի նիստի օրակարգի հարցերից մեկը վերաբերում է ԱԺ ՀՀԿ խմբակցության պատգամավոր  Վահրամ Բաղդասարյանի և ԱԺ փոխնախագահ Էդուարդ Շարմազանովի և այլ պատգամավորների ներկայացրած որոշման նախագծին, որով առաջարկվում է երեխաների ֆիզիկական, մտավոր և հոգևոր լիարժեք զարգացմանը սպառնացող տեղեկություն տարածելը կամ քարոզչություն անելն արգելել հետևյալ իմաստով՝

1) երեխաների ֆիզիկական, մտավոր և հոգևոր լիարժեք զարգացմանը սպառնացող տեղեկություն տարածելը կամ քարոզչությունը այնպիսի տեղեկությունների տարածման գործընթաց է, այդ թվում՝ իրական փաստերի և տեղեկատվության խեղաթյուրման միջոցով, որի նպատակն է ազդեցություն գործել երեխաների ֆիզիկական, մտավոր կամ հոգևոր լիարժեք զարգացման վրա և որն ուղղված է երեխաների մոտ՝

ոչ ավանդական սեռական հարաբերությունների գրավչության պատրանքի ստեղծմանը.

ավանդական և ոչ ավանդական սեռական հարաբերությունների սոցիալական խեղված ընկալմանը.

ոչ ավանդական սեռական հարաբերությունների վերաբերյալ տեղեկատվության հարկադրական մատուցմանը.

ոչ ավանդական սեռական հարաբերությունների նկատմամբ հետաքրքրության առաջացմանը.

Հարցի զեկուցող Աշխատանքի և սոցիալական հարցերի նախարարի պաշտոնակատարի տեղակալ Արսեն Մանուկյանն ասաց, որ առաջարկում են այս որոշման նախագիծը չընդունել, քանի որ նման կարգավորումները չեն նպաստելու այս խնդրի լուծմանը, ինչին էլ ի պատասխան վարչապետի պաշտոնակատար Նիկոլ Փաշինյանն ասաց, որ որքան էլ խստացնեն օրենքները, միևնույնն է,  կա համացանցի հասանելիություն։

«Սեռական փոքրամասնությունների դեմ պայքարի քարոզչությունը որոշակի ժամանակից վերածվում է քարոզչության։ Այս երեխաները, որ լուրերով լսեն, չե՞ն ասելու այդ մարդիկ ովքե՞ր են, որոնց դեմ պայքար է տարվում։ Այնպես որ, եթե չենք ուզում քարոզչություն անել, օրենքի նախագծի վերաբերյալ քննարկումը պետք է լինի գաղտնի, նախագծի հեղինակներն էլ պետք է դա գաղտնի անեն, մանավանդ որ անհասկանալի է՝ ինչո?ւ են էս կարգի խնդիրները հրատապ դառնում այսօրվա Հայաստանում»։

Մանրամասները՝ տեսանյութում։